भांगरभूंय | प्रतिनिधी
भारत आनी न्युझिलॅण्ड ह्या पंगडां मदीं हांगाच्या वानखेडे मैदानाचेर चालू आशिल्ली तिसरी टॅस्ट मॅच उमळशीक वाडोवपी स्थितींत पावल्या. भारताक मॅचीच्या चवथ्या डावांत 140 परस चड धांवड्यो करच्यो पडटल्यो, टर्न जावपी खेळपट्टीचेर ह्यो धांवड्यो करप कठीण जावये.
मजगतीं, मॅचीच्या दुसऱ्या दिसा न्युझिलॅण्डान पयल्या डावांत काडिल्ल्या 235 धांवड्यांक जाप दिवपी भारतान 4 बाद 86 धांवड्यां वयल्यान मुखार खेळपाक सुरवात केली. पयल्या दिसाचे नाबाद बॅट्समन ऋषभ पंत आनी शुभमन गिल हे दोगूय फॉर्मांत दिसले. दोगांयनी अर्द शेंकडे पुर्ण केले. पूण, दोगां मदीं 100 धांवड्यांची भागिदारी पुर्ण जावचे पयलीं लेग स्पिनर ईश सोधीन ऋषभ पंताक एलबीडब्ल्यू बाद केलो. पंतान 59 बॉलांनी 60 धांवड्यो केल्यो. हातूंत आठ चवक्यांचो आनी दोन सक्यांचो आस्पाव आशिल्लो. पंत आनी गिल हांचे मदीं 96 धांवड्यांची भागिदारी जाली. पयल्या दिसा धडपडपी भारताक तांणी बरे स्थितींत हाडलो.
पंत बाद जाल्या उपरांत गिलान एक बाजू सांबाळून धरली. पूण, दुसरे वटेच्यान विकेटी पडप चालूच उरलें. वॉशिंग्टन सुंदरान (नाबाद 38) गिलाक बरी साथ दिवपाचो यत्न केलो. पूण, गिल वैयक्तीक 90 धांवड्यांचेर बाद जालो. ताका एजाज पटेलान तंबूत धाडलो.
एजाज पटेलान फाटले खेपे मुंबय टॅस्ट खेळिल्लो त्या वेळार ताणें 10 विकेटी घेतिल्ल्यो. हे खेपे ताणें पांच विकेटी घेतल्यो. जेवणाच्या विसवा उपरांत भारताच्या बॅट्समनाक एजाज पटेला मुखार तग धरपाक जमलो ना. अखेरे 28 धांवड्यांची म्हत्वाची आघाडी घेवन भारताचो डाव सोंपलो.
दुसऱ्या डावांत न्युझिलॅण्डाचो विकेटी पडपाचो क्रम पयले ओव्हरी सावन सुरू जालो. आकाश दीपान पांचव्या बॉलाचेर मुखेली टॉम लॅथमाक बोल्ड केलो. ते उपरांत डॅव्होन कॉन्वे (22) आनी विल यंग (51) हांणी व्हड भागिदारी करपाचो यत्न केलो. पूण, वॉशिंग्टन सुंदरान ही जोडी फोडली.
ते उपरांत डॅरील मिचेल (21) आनी ग्लॅन फिलिप्स (26) हांणी यंग हाका साथ दिवपाचो यत्न केलो. पूण, दोगूय खेळपट्टीचेर स्थीर जाल्या उपरांत वळेरेन रवींद्र जडेजा आनी आर आश्विन हाचे शिकार जाले.
पयल्या डावांत पांच विकेटी घेवपी जडेजान काल चार विकेटी घेतल्यो. जाल्यार पयल्या डावांत एकूय विकेट घेवंक नाशिल्ल्या आश्विनान तीन विकेटी मेळयल्यो.
सध्या न्युझिलॅण्डान 9 विकेटी व्हगडावन 171 धांवड्यो केल्यात. ताची आघाडी 143चेर पावल्या. चवथ्या डावांत 150 परस चड धांवड्यांची मोख भारता खातीर कठीण जावये.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
