न्युझिलॅण्डाचो जैताचो चौको

भांगरभूंय | प्रतिनिधी

न्युझिलॅण्ड पंगडान संवसारीक वन डे क्रिकेट सर्तींत अफगाणिस्तानाक 149 धांवड्यांनी हारोवन सेगीत चौथ्या जैताची नोंद केली. अफगाणिस्तानान सध्याचो संवसारीक वस्ताद इंग्लंड पंगडाक हारयल्या उपरांत न्युझिलॅण्डाक खर आव्हान दितलो अशें दिशिल्लें. पूण, न्युझिलॅण्डान झणझणीत जैत मेळयलें.

टॉस हारल्या उपरांत पयलीं बॅटींग करपी न्युझिलॅण्डान निर्धारीत 50 ओव्हरींनी 6 विकेटी वगडावन 288 धांवड्यो केल्यो. ते उपरांत अफगाणिस्तानाचो डाव 34.4 ओव्हरींनी 139चेर सोंपयलो.

ह्या जैतान न्युझिलॅण्डाचे आठ गूण जाले आनी तो गुणतकट्यांत पयले सुवातेर पावलो.

अफगाणिस्तानाक सादूर खेळ करून लेगीत आपलो ठसो उमठोवपाक जमलो ना. 27 धांवड्यांचेर ताची पयली विकेट पडली. रहमनुल्लाह गुरबाज (11) मॅच हॅन्रीच्या बॉलाचेर बोल्ड जालो. फुडले ओव्हरींत ट्रॅण्ट बोल्टान इब्राहिम झाद्रानाक (14) कॅच बाद केलो. 14वे ओव्हरींत ल्युकी फर्ग्युसनाच्या बावन्सराचेर मुखेली हशमतुल्लाह शाहिदी फटावलो आनी मिचेल सॅटनरान उत्कृश्ट कॅच धरली. आझमतुल्लाह ओमारझाई (27) आनी रहमत शाह हांची 54 धांवड्यांची भागिदारी ट्रॅण्ट बोल्टान सोंपयली. राचीन रविंद्रान रहमताक (36) एलबीडब्ल्यू बाद करून 107 धांवड्यांचेर अफगाणिस्तानाचो अर्दो पंगड तंबूंत धाडलो.

पंगडांतलो सगल्यांत अणभवी खेळगडो मोहम्मद नबी (7) आनी राशीद खान (8) हांकां वळेरेन सॅण्टनर आनी फर्ग्युसन हांणी तंबूंत धाडून न्युझिलॅण्डाचें जैत निश्चीत केलें. मुजीब उर रहमान (4) व्हड शॉर्ट मारपाच्या यत्नांत फर्ग्युसनाच्या बॉलाचेर कॅच बाद जालो. ते उपरांत फाटोफाट विकेटी पडल्यो. मिचेल सॅण्टनर आनी फर्ग्युसन हाणें दरेकी 3 विकेटी घेतल्यो.

इंग्लंडाक हारोवन सगल्यांक अजापाचो धपको दिवपी अफगाणिस्तानाचो खेळ बरो जालो ना. ताच्या खेळगड्यांनी पांच सोंप्यो कॅची सोडल्यो. ग्लॅन फिलिप्स (71) आनी टॉम लॅथम (68) हांणी मेळिल्ले जीवनदानाचो योग्य रितीन फायदो करून घेतलो. वैयक्तीक अर्द शेंकड्यां खेरीत तांणी 144 धांवड्यांची भागिदारी केली. मार्क चॅम्पमनान 12 बॉलांनी नाबाद 25 धांवड्यो केल्यो.