भांगरभूंय | प्रतिनिधी
संवसारीक वन डे क्रिकेट सर्तींतली 21वी मॅच येजमान भारत आनी न्युझिलॅण्ड ह्या पंगडां मदीं हांगाच्या हिमाचल प्रदेश क्रिकेट असोसिएशनाच्या मैदानाचेर जातली.
सर्तींत अजून मेरेन ह्याच पंगडांनी एकूय हार घेवंक ना. ताका लागून जैताची धांव कायम राखपाचो दोनूय पंगडांचो यत्न आसतलो. दोनूय पंगडांचे दरेकी चार मॅचींतल्यान आठ गूण जाल्यात. पूण, बरे नेट रनरेटीच्या आदाराचेर न्युझिलॅण्ड गूणतकट्यांत पयले सुवातेर आसा. भारत दुसरे सुवातेर आसा.
भारतान आपले पयले मॅचींत ऑस्ट्रेलिये आड सामकी बाबत सुरवात केल्ली. तरी आसतना अखेरेक स विकेटींनी जैत जोडपाक येस मेळयिल्लें. ते उपरांत अफगाणिस्तान, पाकिस्तान आनी बांगलादेश ह्या पंगडां आड सोंपें जैत जोडिल्लें.
आयसीसीचे सर्तीच्या इतिहासाचेर नदर मारली जाल्यार भारताक 20 वर्सां सावन न्युझिलॅण्डा आड जैत जोडपाक शक्य जावंक ना. 2003त दक्षीण आफ्रिकेंत जाल्ले संवसारीक वन डे सर्तींत भारतान निमाणे खेपे न्युझिलॅण्डाक हारयिल्लो. त्या वेळार सौरव गांगुलीच्या फुडारपणाखाला खेळपी भारतान 7 विकेटींनी जैत जोडिल्लें.
भारतान चारूय मॅची मोखीटो फाटलाव करतना जिखल्यात. तशेंच सकयले सुवातेर बॅटींग करप्यांचो कस लागूंक ना.
दुसरे वटेन न्युझिलॅण्डान उक्तावणाचे मॅचींत इंग्लंडाक 9 विकेटींनी हारयल्या उपरांत नॅदरलॅण्डा आड 99 धांवड्यांची जैत जोडिल्लें. तिसरे मॅचींत ताणें बांगलादेशा आड आठ विकेटींनी आनी अफगाणिस्ताना आड 149 धांवड्यांनी व्हड जोडिल्लें.
आयचे मॅची खातीर अश्टतासांचो खेळगडो हार्दिक पांड्या उपलब्ध आसचो ना. बांगलादेशा आडचे मॅचींत बॉलींग करतना ताचें धोंपर दुखाविल्लें. ताका लागून ताचे सुवातेर योग्य पर्याय वेंचपाचें आव्हान पंगड वेवस्थापना मुखार आसतलें.
ताचे सुवातेर इशान किशन आनी सुर्यकुमार यादव हांचे मदल्या एकल्याची निवड करून बॅटींग विभाग घटमूट करची वा आर आश्विन आनी मोहम्मद शमी हातूंतल्या एकल्याची निवड करून बॉलिगेंत विविधताय हाडची हो प्रस्न आसा.
इशान किशन वा सुर्यकुमार यादवाक खेळयलो जाल्यार ताचे कडेन बॉलिंगेंत फकत पांच पर्याय उपलब्ध आसतले. अशे परिस्थितींत शार्दुल ठाकूराक ताच्या कोटांतल्यो धावूय ओव्हरी करच्यो पडटल्यो. आश्विन वा शमी हातूंल्या एकल्याक खेळोवन बॉलींग विभाग घटमूट केलो जाल्यार बॅटींग फळी दुबळी पडटली.
पांड्याचो पर्याय सोदतना पंगड वेवस्थापनाक ह्या मैदानाचेर पडपी दंवाचेर लेगीत लक्ष दवरचें पडटलें. एक तज्ञ बॉलर आनी एक तज्ञ बॅट्समन खेळपाचो निर्णय घेता जाल्यार शार्दुल ठाकूराक भायर बसचें पडुये.
भारताच्या सुरवातीच्या बॅट्समनांनी बरी बॅटींग केल्या. रोहित शर्मान चार मॅचींनी खेळटना एक शेंकडो आनी एका अर्द शेंकड्याचे मजतीन 265 धांवड्यो करून सर्तींत सगल्यांत चड धांवड्यो करपाचे वळेरेंत दुसरे सुवातेर आसा. जाल्यार कोहली 129चे सरासरीन 259 धांवड्यो करून तिसरे सुवातेर आसा. कोहलीन अजून मेरेन एक शेंकडो आनी दोन अर्द शेंकडे मारल्यात.
लोकेश राहुल आनी श्रेयस अय्यर हांणी लेगीत उपेगी खेळी केल्या. राहुलान ऑस्ट्रेलिये आड कठीण स्थितींत नाबाद 97 धांवड्यांची खेळी करून भारताक जैत मेळोवन दिल्लें. अय्यरान लेगीत एक अर्द शेंकडो मारला. डेंग्युक लागून सुरवातीच्या दोन मॅचींनी खेळूंक नाशिल्ल्या शुभमन गिलान दोन मॅचींनी खेळटना एक अर्द शेंकडो मारला.
बॉलींग विभागान लेगीत अजून मेरेन बरें प्रदर्शन केलां. जसप्रीत बुमरान चार मॅचींतल्यान 10 विकेटी घेवन सर्तींत सगल्यांत चड विकेटी घेवपाचे वळेरेंत दुसरे सुवातेर आसा. रवींद्र जडेजान सात आनी कुलदीप यादवान स विकेटी घेतल्यात. पूण, मोहम्मद सिराज आनी शार्दुल ठाकूर मात्शें म्हारग थारल्यात.
दुसरे वटेन न्युझिलॅण्ड सेगीत दुसरे मॅचींत सदचो मुखेली केन विलियम्सनाचे गैरहाजेरेंत खेळटलो. बांगलादेशा आड बॅटींग करतना ताच्या आखाण्याक दुखापत जाल्ली. विलियम्सन पंगडांतल्यान भायर आसलो तरी न्युझिलॅण्डाची बॅटींग फळी घटमूट आसा. डॅव्हॉन कॉनवे (249 धांवड्यो) आनी रचीन रविंद्र (215 धांवड्यो) हांणी जबरदस्त बॅटींग केल्या. इंग्लंडा आड ह्या दोगांयनी नाबाद शेंकडे मारिल्ले.
मुखेली टॉम लॅथम, विल यंग, ग्लॅन फिलिप्स आनी डॅरेल मिशेल हांणी उपेगी खेळी केल्या. बॉलरांनी लेगीत आपलो शेक दवरला. स्पिनर मिशेल सॅटनरान चार मॅचींनी खेळटना 11 विकेटी घेतल्यात. जाल्यार फास्ट बॉलर मॅट हॅन्रीन चार मॅचींतल्यान 9 विकेटी घेतल्यात. लॉक्यी फर्ग्युसन (3 मॅचींतल्यान 6 विकेटी) आनी ट्रॅण्ट बोल्ट (चार मॅचींतल्यान चार विकेटी) हे जोडयेन लेगीत प्रतिस्पर्धी पंगडांच्या बॅट्समनांक नाकापुरो केल्यात. जाल्यार रविंद्र आनी मिशेल हांणी अश्टतासांची भुमिका बरे तरेन वठयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
