भांगरभूंय | प्रतिनिधी
संवसारीक टी-20 क्रिकेट सर्तीचे सुपर 12 फेरयेंतले पयलेच मॅचींत न्युझिलॅण्डान येजमान आनी सध्याचो वस्ताद ऑस्ट्रेलियेक 89 धांवड्यांनी हारयलो.
न्युझिलॅण्डाक फाटल्या 11 वर्सां पसून ऑस्ट्रेलियेक तांच्याच मैदानांत खंयच्याच प्रकारांत हारोवपाक जमूंक नाशिल्लो. पूण, ताणें काल जबरदस्त प्रदर्शन करून जैताचो दुकळ काल सोंपयलो.
न्युझिलॅण्डान सांघीक प्रदर्शनाचें दर्शन घडयलें. डॅव्हॉन कॉन्वे आनी फिन अॅलन हांचे उत्कृश्ट बॅटिंगे उपरांत मिचेल सॅंटनर, टीम सावथी आनी इश सोधी हांणी जबरदस्त बॉलींग करून आपल्या पंगडाक जैत मेळोवन दिलें.
23 वर्सां पिरायेच्या फिन अॅलनान आक्रनक सुरवात करून दिली. ताणें 16 बॉलांनी पांच चवके आनी तीन सक्यांचे मजतीन 42 धांवड्यो केल्यो. ते उपरांत कॉन्वेन सगलीं सुत्रां आपल्या हातांत घेतली आनी केन विलियम्सन आनी जिमी निशॅम हांच्या वांगडा मेळून पंगडाक बऱ्यो भागिदाऱ्यो करून करून ऑस्ट्रेलियेक 201 धांवड्यांची मोख दिली.
कॉन्वे आनी केन विलियम्सन (23) हांणी 69 धांवड्यांची भागिदारी केली. जिमी निशॅमान कॉन्वेक बरी साथ दिली. कॉन्वेन 58 बॉलांनी सात चवके आनी दोन सक्यांचे मजतीन नाबाद 92 धांवड्यांची खेळी केली. निशॅमान 13 बॉलांनी दोन सक्यांचे मजतीन नाबाद 26 धांवड्यो करून न्युझिलॅण्डाक 3 बाद 200 धांवड्यांचो पल्लो गांठून दिलो.
निशॅम आनी कॉन्वे हांणी 24 बॉलांनी नाबाद 48 धांवड्यांची भागिदारी केली. ग्लॅन फिलिप्सान कॉन्वे सयत 18 बॉलांनी 27 धांवड्यो केल्यो. जोश हेजलवुडान 41 बॉलांनी 2 विकेटी घेतल्यो.
प्रत्त्युत्तर दिवपी ऑस्ट्रेलियेची सुरवात बरी जाली ना. दुसऱ्या स्लिपांत जीवनदान मेळिल्लो डॅव्हीड वॉर्नर (5) दुसरे ओव्हरींत पयल्याच बॉलाचेर वित्रीत पद्दतीन बोल्ड जालो. टीम सावथीची ही टी-20तली 123 विकेट थारली आनी सगल्यांत चड विकेटी घेवपी शाकिब अल हसनाचो (122) विक्रम मोडलो. ते उपरांत ऑस्ट्रेलियेक एका फाटल्यान एक धपको बसत गेलो.
अॅरोन फिंच (13), मिचेल मार्श (16), मार्कस स्टॉयनीस (7) आनी टीम डॅव्हीड (11) हे मोठे शॉर्ट्स मारपाच्या यत्नांत बाद जाले. मिचेल सॅंटनरान उत्कृश्ट बॉलिंगेचें प्रदर्शन करतना तीन विकेटी घेतल्यो.
ऑस्ट्रेलियेचो अर्दो पंगड 68 धांवड्यांचेर तंबूंत परतून गेल्लो. ग्लॅन मॅक्सवेलान एक बाजू सांबाळून धरिल्ली. पूण, इश सोधीन ताका बोल्ड केलो. मॅक्सवेल 28 धांवड्यांचेर बाद जालो आनी ऑस्ट्रेलियेच्यो उरिल्ली सुरिल्ली जैताची आस्तूय सोंपली. सोधीन 4 ओव्हरींनी 29 धांवड्यो दीत 1 विकेट घेतली.
बोल्टान 17वे ओव्हरींत मिचेल मार्श आनी अॅडम झम्पा हांकां बाद केले. न्युझिलॅण्डाची जैताची फक्त औपचारिकताय बाकी आशिल्ली. बोल्टान 24 धांवड्यांनी दोन विकेटी घेतल्यो. सावथीन निमाणी विकेट घेतली. ताणें पॅट कमिन्साक 21 धांवड्यांचेर बाद केलो. सावथीन स धांवड्यांनी तीन विकेटी घेतल्यो. अशे तरेन ऑस्ट्रेलियेचो डाव 111चेर सोंपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
