भांगरभूंय | प्रतिनिधी
गोविंद गावडेः सांखळेचे त्रिपुरारी नौकानयन सर्तींत तळखामेश्वर बॉयज पयले
भांगरभूंय । प्रतिनिधी
दिवचलः त्रिपुरारी पुनवे निमतान सांखळी विठ्ठलापूरचें पांडुरंगाचें देवूळ आनी पर्यटन थळाक नवी झळाळी दिवपाचो सरकार विचार करता. थंय जावपी नौकानयन सर्तींतल्या इनामांचीं रक्कम वाडोवन 50 हजार करतले. तशेंच सर्तींत वांटो घेवपी दरेकल्यान मानधन दितले. मात सर्त आयोजीत करतना पर्यावरणाचो लेगीत विचार जावपाक जाय, अशें गोंय कला आनी संस्कृती मंत्री गोविंद गावडे हांणी सांगलें.
गोंय कला आनी संस्कृती तशेंच पर्यटन खात्यान आयोजीत केल्लो राज्य उत्सव त्रिपुरारी पुनवे निमतान घेतिल्ले नौकानयन सर्तीचीं इनामां भेटवपाच्या सुवाळ्यांत मंत्री गावडे उलयताले. हो सुवाळो सांखळेच्या रवींद्र भवनांत बुधवारा जालो. ह्या वेळार माचयेर मंत्री गावडे हांचे वांगडा मयेंचे आमदार प्रेमेंद्र शेट, सांखळी रवींद्र भवनाचे उपाध्यक्ष विठोबा घाडी, शैलेंद्र फातर्पेंकार, सगुण वेळीप, नारायण सावंत, सरपंच दत्तप्रसाद खरकांडे, अशोक परब, सिद्धार्थ गायतोंडे हाजीर आशिल्ले. ह्या वेळार तांणी आपले विचार मांडले.
त्रिपुरारी पुनवे निमतान घेतिल्ले नौकानयन सर्तींत तळखामेश्वर बॉयज हांकां पयलें इनाम फावो जालें. कली युगी बॉयज कारापूर हांकां दुसरें, भुमी बॉयज पर्यें हांकां तिसरें. यन्सी ग्रूप विठ्ठलापूर हांकां चवथें, ओव्हरलूक पर्यें हांकां पांचवें इनाम फावो जालें. उमेद वाडोवपी इनामां सारंग होंडा सत्तरी, भुतनाथ बॉयज आमोणें, सिक्स ह्रदर्स पर्ये, त्रिपुरातक विठ्ठलापूर, युनीक बॉयज पर्यें आनी उत्कृश्ट कला सादरीकरण वळींत अथर्व टेन पर्यें, शिवाजी गडेकार पेडणें, श्रेयश गडेकार पर्ये, धीरज साळगांवकार शिवनेरी, जय भवानी पर्ये, राजवाडो बॉयज विठ्ठलापूर, जलयान विठ्ठलापूर, ट्रेड आयस आमोणें, संमपुरूस दिवचल, डेट डेवील विठ्ठलापूर ह्या सगळ्यांक रोख आनी पयल्या जैतिवंतांक सरकारा वतीन घोळटो करंडक भेटयलो. सिद्धी उपाध्ये हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.