भांगरभूंय | प्रतिनिधी
इंटेलिजन्स ब्युरोंत नोकरी दिवपाचें भासोवन सुकूरांतल्या नागरिकाक सात लाखांची तोपी घाल्ल्या प्रकरणांत दुबावीत अभिषेक विनोद गिरी (32, रावपी सुकूर, पर्वरी आनी मूऴ लखनौ, उत्तर प्रदेश) ह्या बनावट इंटेलिजन्स अधिकाऱ्याक पर्वरी पुलिसांनी अटक केली.
ही घडणूक फाटल्या नोव्हेंबरांत घडिल्ली. तेन्ना सावन दुबावीत फरारी आसलो. फिर्यादी विशांत राजपुरोहित (सुकूर, पर्वरी) हाका दुबावितान आपूण इंटेलिजन्स अधिकारी आशिल्ल्याचें सांगलें आनी ताच्या भुरग्याक इंटेलिजन्स ब्युरोंत नोकरेक लायतल्याचें हांयस दाखयलें. ते खातीर दुबावितान ताचे कडल्यान 7 लाख रुपया घेतले. दुबावितान वेळावेळार नोकरेक लावपाचें उतर दिलें पूण नोकरी दिनासतनाच दुबावितान फुज्यो काडल्यो. फिर्यादीन ह्या प्रकरणांत पुलिशेंत कागाळ केली. पुलिसांनी सोद घेवन दुबाविताक उत्तर प्रदेशांत वचून फाटल्या 27 एप्रीलाक धरून गोंयांत हाडलो आनी अटक केली. मजगतीं, दुबाविताक पयलो वर्ग न्यायालयान चार दिसांची पुलीस कोठडी फर्मायल्या.
पुलीस अधिक्षक शोबित सक्सेना, उपअधिक्षक विश्वेश कर्पे आनी निरिक्षक अनंत गांवकार हांच्या मार्गदर्शना खाला उपनिरिक्षक प्रणिता मांद्रेंकार, सीताराम मळीक, काॅन्स्टेबल महादेव नायक आनी योगेश शिंदे ह्या पथकान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
