भांगरभूंय | प्रतिनिधी
वेर्णें उद्देगीक वसणुकेंतल्या 130 कामगारांनी काम दवरलें बंद
वास्को: नोकरे संबंदी हमी दिवची हे एकसुरे मागणे खातीर वेर्णें उद्देगीक वसणुकेंतले एके कंपनीच्या एका विभागांतल्या सुमार 130 कामगारांनी काम बंद दवरलें. 15 नोव्हेंबराक तीन वर्सांची कबलात सोंपत आशिल्ल्यान तशेंच तांकां कायमस्वरुपी नोकरेची कसलीच हमी कंपनी दिवपाक तयार नाशिल्ल्यान तांचे मदीं भिरांत पातळ्ळ्या. ह्या प्रकरणांत मुख्यमंत्री डॉ. प्रमोद सावंत हांणी लक्ष घालून आमकां न्याय दिवचो अशी विनंती तांणी केल्या.
हे कंपनींतल्या एका विभागांतल्या 130 कामगारांनी आतां तीन वर्सां जालीं, मुखार कितें हे विशींचो हुस्को उक्तायला. कंपनी एका वर्साचो काळ वाडोवन दिवपाक तयार आसा. पूण नोकरेंत कायम करपा संबंदी कसलेंच आस्वासन दिवपाक तयार ना. कंपनीच्यो अटी जर मान्य नासत जाल्यार काम सोडात अशें स्पश्टपणान तांकां सागिल्ल्याचो दावो त्या कामगारांनी केला.
आमी हे कंपनींत घाम गळयतात. तीन वर्सां आमी खूब हाल सोंसल्यात. सगले निमूटपणान सोंसलां. दिल्लें काम केलां. कंपनी आमच्या कामाची दखल घेवन कायम करतली हे आशेचेर आमी आशिल्ले. पूण कंपनीन कोल्हापूरा मुलाखती घेवन 50 जाणांक 15 तारखे सावन नोकरेचेर येवपा संबंदी पत्रां दिल्ल्याचो दावो कांय कामगारांनी केलो.
आमचे हे परिस्थितीक आमी कंपनीक जापसालदार धरिनात. पूण वेवस्थापन अधिकारी जबाबदार आशिल्ल्याचें तांणी सांगलें. आमकां फाटलीं तीन वर्सां जालीं पगारवाड बी काय दिल्लो ना. पूण आमी ते विशींची कसलीच कागाळूय केल्ली ना अशेंय कामगारांनी म्हणलें.
सरकारान रोजगार मेळावे आयोजीत केल्यात आनी मुख्यमंत्री डॉ. प्रमोद स्वता खाजगी मळाक प्रोत्साहन दितात. तरणाट्यांनी खाजगी क्षेत्रांतल्या नोकऱ्यो आपणावच्यो अशे मुख्यमंत्री सांगतात. पूण हांगा ही कंपनी हेर राज्यांतल्या लोकांक कामार घेता आनी गोंयच्या लोकांच्यो तांच्यो नोकऱ्यो काडून घेवपाचो यत्न करता. नोकरेचे निश्चीती बगर आमची कसलीच मागणी ना. आतांय आमकां पगारवाड नाका. फक्त आमकां नोकरेची हमी दिवची. जर हे कंपनीन आमची सेवा बंद केली जाल्यार आमी अचकीत खंय वचप अशें ह्या कामगारांनी म्हणलें.
आमची नोकरी सुरक्षीत उरची हे खातीर मुख्यमंत्री डॉ. प्रमोद सावंत आनी गोंय सरकारान हस्तक्षेप करचो अशी आमची इत्सा आसा अशेंय कामगारांनी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
