भांगरभूंय | प्रतिनिधी
विस्वासांत घेनासतना ही कृती म्हणल्यार आमचेर अन्याय: जुझे फिलीप
वास्को: नुस्त्या उद्देग खात्याच्या अधिकाऱ्यांनी वास्को पुलिसांचे मजतीन खारीवाडो जेटी कडेन वचपी रस्त्यार काल (बुधवारा) बॅरिकेड्स घाल्ल्यान गोवा फिशींग बोट ऑनर्स असोसिएशनान तिडक उक्तायल्या. विस्वासांत घेनासतना ही कृती म्हणल्यार आमचेर अन्याय आशिल्ल्याचें संघटणेचे अध्यक्ष आनी आदले महसूल मंत्री जुझे फिलीप डिसोझा हांणी म्हणलें. सरकाराच्या ह्या आदेशाक लागून नुस्तें बाजारांत व्हरूंक मेळूंक नाशिल्ल्यान जें लुकसाण जालां तें कोण भरून दितलो असोय प्रस्न केलो.
खारीवाडो फिशींग जेटी वयल्यान नुस्तें व्हरप्यां मदीं जांणी नुस्त्या उद्देग खात्या कडेन नोंदणी केल्या तांकां जेटी वयल्यान भायर वचूंक मेळटलें अशें सांगून नोंदणी करूंक नाशिल्ल्या नुस्तें व्हरपी वाहनांक बुधवारा सकाळीं आडायले.
खात्याच्या अधिकाऱ्यांनी जेटीर कायदो आनी सुवेवस्थेचो प्रस्न निर्माण जावचो न्हय हे खातीर वास्को पुलिसांची मजत घेतली. जेटी कडेन वचपी रस्त्याच्या तोंडारूच पुलिसांनी बॅरिकेड्स घाले. खारीवाडो फिशींग जेटी वयल्यान नुस्तें घेवन गेल्ल्या संबंदितांची खात्या कडेन नोंदणी आसा काय ना हें तपासूंक लागले. ताका लागून कांय नुस्तें व्हरपी वाहनां आडकल्ल्यान फिशींग जेटीर एकूच बोवाळ जालो.
जुझे फिलीप डिसोझा, मायकल परेरा आनी संघटणेचे हेर पदाधिकारी आनी हेरांनी हे संबंदी संबंदीत अधिकाऱ्यां कडेन विचारपूस केली तेन्ना तांणी तांकां परिपत्रक दाखयलें. आमी वेपारी नासून आमी बोटी वरवीं धरिल्ले नुस्तें विक्रे खातीर व्हरतात अशें सांगपाचो यत्न केलो, पूण अधिकाऱ्यांनी तांचे कांयच आयकून घेतलें ना.
जुझे फिलीप डिसोझा हांणी सरकाराचे हे कृती विशीं अजाप उक्तायलें. आमी जाळां, बोट आनी हेर परवान्यां खातीर शुल्क भरतात. आमच्यो खूबश्यो समस्या आसात. ते विशींची संबंदीत खात्याक म्हायती दिवन लेगीत अजून त्यो सुटाव्यो जाल्ल्यो नात. आमी खारीवाडो जेटी दुरुस्ती आनी विस्तारीकरणाची मागणी केल्ली. ती अजून मान्य जाल्ली ना. आमचो वेवसाय सद्या लुकसाणेंत चल्ला. सरकारान हो परंपरीक वेवसाय चालू उरचो हे खातीर प्रोत्साहन दिवपा बदला आमचे मुखार संकश्ट उबें केलां अशें जुझे फिलीप डिसोझान म्हणलें.
मुखर तांणी म्हणलें, आमकां ऑक्ट्राेय दिता हें आस्वासन दिवन दोन वर्सां जालीं, पूण एकूय पयसो मेळिल्लो ना. आमकां मजत करपा बदला सरकार आमचें लुकसाण करीत आशिल्ल्याचें म्हणलें. नुस्तें वेळांत बाजारांत पावूंक नाशिल्ल्यान तें पेड्डेर जावन आमकां लुकसाण जालें. हो कसलो कायदो? खारीवाडो फिशींग जेटी वयल्यो सगल्यो बोटी नोंदणी जाल्यात. आनीक कितें जाय? ही कसली दादागिरी? अशे प्रस्न तांणी विचारले.
फाटल्या तीन म्हयन्यांत जाय तसो वेवसाय जाल्लो ना. एकूय सुंगट मेळिल्लें ना. आमी विवीध परवान्यांचे शुल्क भरतात. कांय बोटी बंद आसात. हे संबंदी सरकारान विचारपूस करपा बदला हे भरात, ते करात अशें सांगतात. आमी जगतले कशे असो प्रस्न कांय जाणांनी उपस्थीत केलो. आतां खारीवाडो जेटी वयल्यान सगलें नुस्तें मडगांवां व्हरतना कर दिवचो पडटलो. मडगांवां गेल्यार ते वरा कणकणीं शुल्क फारीक करचें पडटलें असो दावो तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
