भांगरभूंय | प्रतिनिधी
शॅर परस्पर हस्तांतरींत केल्ल्यान प्रशासकांची कारवाय
भांगरभूंय I प्रतिनिधी
म्हापशेंः नेरूल कोमुनिदादीचें शॅर परस्पर बेकायदो स्वताच्या आनी आपल्या भयणीच्या नांवार हस्तांतरीत करून फटवणूक केल्ले प्रकरणांत नेरूल कोमुनिदादीचे अॅटर्नी रोमानो कोर्डा हांकां दोशी थारावन तांकां पदा वयल्यान बेगोबेग निलंबीत करचे, असो आदेश उत्तर विभाग कोमुनिदादीचे प्रशासक शिवप्रसाद नायक हांणी जारी केला.
तशेंच कोमुनिदादीचें शॅर जप्त करून ते भागधारकांच्या नांवार जारी करपाचे निर्देश काेमुनिदादीक दिल्यात. अॅटर्नीन केल्लो हो गैरप्रकार गुन्यांव दाखल करपाक पात्र थारपा सारको अासा, अशें प्रशासकांनी आदेशपत्रांत नमूद केला.
हे विशीं अनिल केंकरे आनी महेश केंकरे (दोगूय म्हापशें) हांणी कोमुनिदाद प्रशासकां कडेन लेखी कागाळ दाखल केल्ली. आपले शॅर बेकायदो हस्तांतरीत केल्ल्याचो आरोप करून नेरूल कोमुनिदाद अॅटर्नी विरोधांत कारवाय करपाची तशेंच सगले शॅर ताब्यांत घेवपाची मागणी केल्ली.
ते प्रमाण अॅटर्नी सयत तिचे भयणीक कारणा दाखयात नोटीस धाडिल्ली. पूण तांचे भयणीन आपले म्हणणें सादर करूंक ना. मात अॅटर्नी रोमानो कोर्डान नोटिशेक लेखी जाप दिल्ली. ते उपरांत कोमुनिदाद प्रशासकांनी सुनावणी घेतली. हे सुनावणे उपरांत प्रशासकांनी अॅटर्नी कोर्डा हांकां ताकतिकेन निलंबीत करपाचो आदेश दिला. तशेंच बेकायदो हस्तांतरीत केल्ले दरेकी 10 शॅर फिर्यादी केंकरे हांच्या ताब्यांत दिवपाचो आदेश दिला.
ह्या प्रकरणांत अॅटर्नी कोर्डा हांकां कोमुनिदाद कायद्याचें कलम 74 खाला सेवेंतल्यान निलंबीत करपाचो आदेश दिला. तशेंच बेकायदो हस्तांतरीत केल्ले क्रमांक 1810 ते 1819 आनी 1820 ते 1829 हे शॅर ताब्यांत घेवन ते दोनूय फिर्यादी कडेन दिवचे, अशेंय निर्देश दिल्यात.
मजगतीं, हो प्रकार उक्ताडार आयले उपरांत नेरूल कोमुनिदाद समितीन थाराव घेवन अॅटर्नी कोर्डा हांचे विरोधांत पर्वरी पुलिशेंत कागाळ दाखल केल्ली. हे कागाळेक कोमुनिदाद प्रशासकां लागीं अॅटर्नी कोर्डा हांणी आव्हान दिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
