भांगरभूंय | प्रतिनिधी
पणजी : नॅशनल हेराल्ड प्रकरणाच्या निर्णया आड प्रदर्शन करून कॉंग्रेस पक्ष जनतेची दिकाभूल करता. हें प्रकरण २०१२ वर्सा सुरू जाल्लें. तेन्ना केंद्रांत कॉंग्रेसीचेंच सरकार आशिल्लें. तेन्ना तांणी भाजपाक दोश दिवप चुकीचें. ह्या प्रकरणांत कांयच घोटाळो नासल्यार कॉंग्रेस फुडार्यांनी ईडी आयकर नोटीसांक जाप दिवची अशी प्रतिक्रिया भाजप प्रदेशाध्यक्ष दामू नायक हांणी उक्तायली. बिरेस्तारा पणजे जाल्ले पत्रकार परिशदेंत ते उलयताले.
कॉंग्रेसीक देशभरची सगली मालमत्ता आपलीच अशें दिसता. तांकां आपूण कायद्या परस व्हड आसात आनी जनतेक कांयच समजना अशें दिसता. हे मानसीकतायेंतल्यानूच सध्या कॉंग्रेस देशभरांत धरणें आंदोलन करता. मुळात नॅशनल हेराल्ड प्रकरण १ नोव्हेंबर २०१२ सुरू जाल्लें. तेन्ना भाजप फुडारी सुब्रमण्यम स्वामी हांणी राहुल गांधी, सोनिया गांधी हांचेर नॅशनल हेराल्डची मालमत्ता लुटपाचो आरोप केल्लो, अशें तांणी मुखार म्हणलें.
कॉंग्रेस फुडार्यांनी नॅशनल हेराल्डची सुमार अडेज हजार कोटी रुपयांची मालमत्ता स्वताच्या नावाचेर केल्या. तेन्ना नॅशनल हेराल्डाक कॉंग्रेस पक्षान ९० कोटी रुपयांचें रीण दिल्लें. कॉंग्रेस फुडार्यांनी यंग इंडिया प्रायव्हेट लिमिटेड नावंाची एक नवीन कंपनी स्थापन केली. नॅशनल हेराल्डवेल्या ९० कोटी रुपयांच्या कर्जाच्या बदलाक तांची अडेज हजार कोटी रुपयांची मालमत्ता यंग इंडियाच्या नांवार केली. यंग इंडियांत सोनिया आनी राहुल गांधी हे दरेकी ३८ टक्के भागधारक आसा.
कॉंग्रेस पक्ष हो पयशे दिवपा-घेवपाची मनी ट्रान्स्फर कंपनी न्हय. तरी तांणी यंग इंडिया वांगडा अर्थीक नदरेन दिवपा-घेवपाचो वेव्हार केला. सध्या कॉंग्रेस आंदोलनां करून धमकेची भास वापरता. ते ह्या प्रकरणाक राजकीय रंग दिवपाचो यत्न करता. हाचो अर्थ हो पक्ष पयलीं चोरी करून आतां आपूण शाशेपणां करता. भाजपा वतीन आमी हे गजालीचो निशेध करतात. आमी नॅशनल हेरॉल्ड प्रकरणाची खरी म्हायती घराघरांनी पावयतले अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
