भांगरभूंय | प्रतिनिधी
प्रकरणांत घोटाळो नासल्यार काँग्रेस फुडाऱ्यांनी ईडी नोटिशेक जाप दिवची पणजीः नॅशनल हेराल्ड प्रकरणांतल्या निर्णयाचो निशेध करून काँग्रेस लोकांची दिशाभूल करता. हे प्रकरण 2012 वर्सा सुरू जाल्ले. तेन्ना काँग्रेस सरकार केंद्रांत आशिल्लें. मागीर तांणी भाजपाक दोश दिवप चुकीचें. ह्या प्रकरणांत घोटाळो ना जाल्यार काँग्रेसीच्या फुडाऱ्यांनी ईडी आयकर कराच्या नोटीसांक जाप दिवची अशी प्रतिक्रिया भाजपाचे प्रदेशाध्यक्ष दामू नायक हांणी उक्तायल्या. बिरेस्तारा पणजेंत घेतिल्ले पत्रकार परिशदेंत ते उलयताले.
देशभरांतली सगळी मालमत्ता आपलीच अशें काँग्रेसीचें मत आसा अशें नायक हांणी सांगलें. तांकां आपूण कायद्या परस वयर आसा अशें दिसता. तांकां दिसता भौसाक कांयच समजना. हेच मानसिकतेन सध्या काँग्रेस देशभर धरणें अांदोलन करता. नॅशनल हेराल्ड प्रकरण मुळांत 1 नोव्हेंबर 2012 सावन सुरू जाल्ले. तेन्ना समाजीक वावुरपी सुब्रमण्यम स्वामी हांणी राहुल गांधी आनी सोनिया गांधी हांणी नॅशनल हेराल्डाची संपत्ती लुटल्या असो आरोप केलो.
काँग्रेसीच्या फुडाऱ्यांनी नॅशनल हेराल्डाची सुमार 2,500 कोटी रुपयांची संपत्ती आपल्या नांवान विनियोग केल्या अशें तांणी सांगलें. त्या वेळार काँग्रेस पक्षान नॅशनल हेराल्डाक 90 कोटी रुपयाचें रीण दिल्लें. काँग्रेसीच्या फुडाऱ्यांनी यंग इंडिया प्रायव्हेट लिमिटेड नांवाची नवी कंपनी स्थापन केली. नॅशनल हेराल्डाचेर 90 कोटी रुपया रिणाच्या बदला ताची 2,500 कोटी रुपयांची संपत्ती यंग इंडिया कडेन हस्तांतरीत जाली. सोनिया आनी राहुल गांधी हांचे कडेन यंग इंडियाचे 38 टक्के शेअर आसात.
काँग्रेस पक्ष ही पयशांची आयात-निर्यात हस्तांतरण कंपनी न्हय. तरी लेगीत तांणी यंग इंडिया कडेन अर्थीक वेव्हार केला. सध्या काँग्रेस निशेध करून धमकावपी भास वापरता. ह्या प्रस्नाक राजकी रंग दिवपाचो ते यत्न करतात. हाचो अर्थ हो पक्ष पयलीं चोरयो करता आनी आतां धाडसी चाल चलता. भाजपा वतीन हाचो आमी निशेध करतात. नॅशनल हेराल्ड प्रकरणाची खरी म्हायती आमी दरेका घरांघरांत पावयतले, अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
