भांगरभूंय | प्रतिनिधी
भांगरभूंय । प्रतिनिधी
पणजीः विद्या प्रबोधिनी शिक्षण संस्थेक धा वर्सां जातात त्या निमतान गोंयांतल्या सगल्या म्हाविद्यालयांचे प्राचार्य आनी प्रशासकीय अधिकाऱ्यांक नॅक मानांकन मेळोवा खातीर लागपी सात मुळाव्या टप्प्यांची म्हायती दिवपा खातीर 7 डिसेंबराक एका दिसाची कार्यशाळा आयोजीत केल्या. विद्या प्रबोधिनी वाणिज्य म्हाविद्यालयाचो प्राचार्य डॉ भूषण भावे हांणी पत्रकार परिशदेंत ही म्हायती दिली.
7 डिसेंबराक सकाळी 10 वरांचेर सुरू जावपी हे कार्यशाळेंत चार सत्रां जातलीं. नॅक संस्थेचो कार्यकारी अध्यक्ष प्रा. भूषण पटवर्धन पयल्या सत्रांत मार्गदर्शन करतलो. ह्या वेळार मुख्यमंत्री डॉ प्रमोद सावंत आनी गोंय विद्यापिठाचो कुलगुरू प्रा. हिरालाल मेनन हाजीर रावतले. दुसऱ्या सत्रांत परिसंवाद जातलो आनी उद्देजक श्रीनिवास धेंपें ताची येजमानकी चलयतले. प्रा. विकास पिसुर्लेकार, दिलीप आरोलकार, नदाफ , नॅकाची लिना गहाणे उलोवपी म्हणून परिसंवादांत वाटेकार जातली. नव्या शिक्षणीक धोरणाचे फाटभुंयेर नॅक खातीर कशी तयारी करची हे विशीं हे उलोवपी मार्गदर्शन करतले.
परिसंवादाक दरेका म्हाविद्यालयाचो प्राचार्य, आयक्यूएसी, नॅक आनी इनइपी समन्वयक अशे चार प्रतिनिधी हाजीर रावतले. वट्ट 200 प्रतिनीधी हे कार्यशाळेक येवपाची शक्यताय आसा अशें भूषण भावे हांणी सांगलें. पत्रकार परिशदेक विद्या प्रबोधिनी शिक्षण संस्थेचो अध्यक्ष संजय वालावकार, आनी डॉ अरूण मराठे हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
