भांगरभूंय | प्रतिनिधी
म्हापशें: हरियाणांतली भाजपा फुडारी सोनाली फोगट खून प्रकरणा कडेन संबंदीत घुंवळे वखदां प्रकरणांतलो दुबावीत एडवीन नूनीस सयत तीन दुबाविताक म्हापशें न्यायालयान सात दिसांची न्यायालयीन कोठडी फर्मायल्या. जाल्यार नूनीस हाच्या जामीन अर्जाचेर 6 सप्टेंबराक सुनावणी जातली.
कर्लीस क्लबाचो धनी दुबावीत एडवीन नूनीस, सोनाली खून प्रकरणांतल्या दुबावितांक घुंवळे वखदांची पुरवण करपी हॉटेल ग्रॅण्ड लिओनीचो रून बॉय दुबावीत दत्तप्रसाद गांवकार आनी ताका घुंवळे वखदांची पुरवण करपी रामदास उर्फ रामा मांद्रेंकार ह्या तिगांकूय पुलिसांनी अतिरिक्त कोठडे खातीर शुक्रारा म्हापशेंच्या प्रथमवर्ग न्यायालयांत हाजीर केले. त्या वेलार तिनूय दुबावितांक सात दीस न्यायालयीन कोठडेंत दवरपाचो आदेश न्यायालयान दिलो. ते उपरांत दुबावितांक कोलवाळ बंदखणींतल्या न्यायालयीन कोठडेंत धाडले. फोगट खून प्रकरणांतले दुबावीत सुधीर पाल आनी सुखविंदर सिंग हांकां घुंवळे वखदांची पुरवण केल्ल्याच्या आरोपा खाला पुलिसांनी दुबावीत दत्तराज गांवकार आनी रामदास मांद्रेंकार हांकां अटक केल्ली. जाल्यार कर्लीस क्लबाचे धनी दुबावीत एडवीन नूनीस हाका पुलिसांनी अटक केल्ली.
6 सप्टेंबराक फुडली सुनावणी
दुबावीत एडवीन नूनीसान दाखल केल्ल्या जामीन अर्जाचेर शुक्रारा म्हापशेंच्या अतिरिक्त जिल्हो आनी सत्र न्यायालयांत सुनावणी जाली. ह्या वेळार पुलिसांन आपलें म्हणणें न्यायालया मुखार मांडलें. ते उपरांत फुडली सुनावणी 6 सप्टेंबराक न्यायालयान निश्चीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
