निवृत्त न्यायाधीश व्ही. के. जाधव चवकशी आयोगाचे आयुक्त
भांगरभूंय | प्रतिनिधी
जमीन बळकावप प्रकरणाचें कनेक्शन विदेशा मेरेन
- पणजी : बनावट कागदां तयार करून जमीन बळकावप प्रकरणांच्या चवकशे खातीर सरकारान मुंबय उच्च न्यायालयाचे निवृत्त न्यायाधीश व्ही. के. जाधव हांची आयोगाच्या आयुक्तपदार नेमणूक केल्या. हो अायोग 4 म्हयन्यांत अहवाल सादर करतलो, अशें मुख्यमंत्री डॉ. प्रमोद सावंत हांणी सांगलें.
आल्तिनो बंगल्यार चवथीच्या आदले दिसा पत्रकार परिशदेंत मुख्यमंत्र्यान ही म्हायती दिली. ह्या वेळार तांचे वांगडा पुलीस म्हानिरिक्षक ओमविरसिंग बिश्नोई हाजीर आशिल्ले.
जमीन बळकावप प्रकरणांतले कांय दुबावीत देशा भायर पळून गेल्यात, जाल्यार कांय जाण बेपत्ता आसात. बेवारस जमिनी बळकावपाचे प्रकार राज्यांत मोट्या प्रमाणांत घडल्यात. हाची चवकशी करपा खातीर सरकारान 15 जून 2022 दिसा खासा तपास पंंगड (एसआयटी) स्थापन केल्या. एसआयटी कडेन आतां मेरेन 93 कागाळी आयल्यात. 93 कागाळींतल्यान 40 कागाळींचेर गुन्याव नोंद जाला. चडशो कागाळी बार्देस म्हालांतल्यो आसात. अटक केल्ल्या मदीं सरकारी कर्मचाऱ्यांचो लेगीत आस्पाव आसा. एसआयटीन आतां मेरेन 15 जाणांक अटक केल्या. तशेंच 110 गुन्याव नोंद केल्यात. सुमार देड लाख चौखण मिटर जमीन बळकायिल्ल्याचे सध्या स्पश्ट जाला.
चवकशी आयोग बेवारस जमनीच्या धनयांचो घेतले सोद
ज्यो जमनी बळकायल्यात तातूंतल्या कांय जमनींचे धनी मेळ्ळ्यात. कांय जमनींचे धनी अजून मेळूंक नात. सरकारी जमनी लेगीत बळकायल्यात. चवकशे खातीर 1952च्या कायद्या प्रमाण आयोग स्थापन जाला. आयोगाक कार्यालय तशेंच फावो ते कर्मचारी दितले. पयलीं बसका जाले उपरांत 4 म्हयन्यांत अहवाल सादर करचो पडटलो. कागदपत्रां तशेंच कायदेशीर गजालींची तपासणी करून आयुक्त जमनींच्या धनयांचाे सोद घेतले. बळकायल्यो जमनी खऱ्या धनयांक मेळटल्यो. जमनीचे धनी नात, त्यो जमनी सरकाराच्या ताब्यांत वतल्यो.
कायदो बदलाची शिफारस करतले
चवकशी तशेंच जमनी धनयांक दिवपा खातीर कायद्यांत दुरुस्ती वा बदल करपाच्यो शिफारसी चवकशी आयुक्त करतले. सरकारी सोपस्कारांतले उणाव लेगीत आयोग सोदून काडटलो. अहवाल आयले उपरांत सरकार कार्यवाही करतलें. डिसेंबर मेरेन प्रक्रिया पुराय जातली, अशें मुख्यमंत्री डॉ. प्रमोद सावंत हांणी सांगलें.
विदेशांतल्यान दुबावितांक हाडटले
जमीन बळकावप प्रकरणांतले कांय दुबावीत बेपत्ता आसात. कांय जाण विदेशांत पळून गेल्यात. अशा दुबावितांक विदेशांतल्यान भारतांत हाडपा खातीर त्या देशां कडल्यान हरकत ना दाखले घेवपाची गरज आसा. बेपत्ता दुबावितांचो सोद सुरू आसा. 164 कलमा खाला दुबावितांच्यो जबानी घेवप सुरू आसा. पोर्तुगीज, कोंकणी आनी इंग्लीश भास जाणा जावपी तज्ञांची सरकारान नेमणूक केल्या, अशें पुलीस म्हानिनिरिक्षक ओमविरसिंग बिश्नोई हांणी सांगले.
जमीन बळकावप प्रकरणात राजकारण्यांंचोय आस्पाव आसपाची शक्यताय मुख्यमंत्र्यांंनी हाचे पयलीं उक्तायल्या. राजकारण्यांंचीं नांवां आयले उपरांत कसलीच तडजोड जावची ना. सगल्यांची नागरी तशेंच न्यायालयीन चवकशी जातली. न्यायालयीन चवकशे खातीर चवकशी आयोग स्थापन करपाची घोशणा मुख्यमंत्री डॉ. सावंत हांणी सोमारा केल्ली. हाचे उपरांत आयुक्तांची नेमणूक जाली.
26 जमनींच्या धनयांचो लागलो सोद
जमीन बळकावप प्रकरणांतल्या 93 जमनींचो तपास एसआयटी करतली. 93 जमनींतल्यान सध्या 40 जमनींचो तपास चालू आसा. सध्या 26 जमनींच्या धनयांचो सोद लागला. 67 जमनींच्या धनयांचो सोद घेवपाचें काम चालू आसा. गुन्यांव फांट्याच्या उपअधिक्षकांच्या फुडारपणा खाला तपासा खातीर आनीक एक पंगड स्थापन जाला, अशें पुलीस म्हानिरिक्षक ओमविरसिंग बिश्नोई हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
