भांगरभूंय | प्रतिनिधी
भारतांत 2021 वर्सा 60 वर्सां पुराय करपी ज्येश्ठ नागरिक 13.80 टक्के आशिल्ले. हो आंकडो 2031 मेरेन 19.40 कोटी जातलो, असो अदमास. 2011 वर्साचे तुळेंत 2021 वर्सा ज्येश्ठ नागरिकांचो आंकडो 3.40 कोटींनी वाडला. सरकारी, खाजगी नोकऱ्यांनी निवृत्तीची पिराय 58 ते 65 वर्सां मेरेन आसा.
आमचे कडेन साबार राज्यांनी निवृत्तीची पिराय साठ वर्सां आसा. न्यायालयांत मात ती 65 वर्सां. हालींच्या काळांत वैजकी सुविधा, योग्य आहाराक लागून आयुश्य वाडत आसा, साहजिकूच पेन्शना पसून सगळे फायदे दिवप सरकाराक आव्हानात्मक जावपाक लागलां. अशा वेळार निवृत्तीची पिराय वाडयल्यार तांकां नोकरदाराक उरिल्ल्या जिवितांत नेमान पेन्शन दिवप सोंपें जातलें, हे खातीर निवृत्ती पिराय वाडोवची, अशी मागणी भविश्य निर्वाह निधी हे संघटनेने केल्या.
युरोपीय संघटनेच्या देशांची निवृत्ती पिराय 65 वर्सां आसा. डेन्मार्क, इटली आनी ग्रीसांत 67 वर्सां. अमेरिकेंत नागरिक 66 वर्सांचेर निवृत्त जातात. भविश्य निर्वाह निधीच्या म्हणण्या प्रमाण, हेर देशां प्रमाण भारतांत निवृत्तीची पिराय वाडयल्यार पेन्शनाचेर कसलोच ताण येवचो ना. देशांतल्या जायत्या ज्येश्ठ नागरिकांची भलायकी बरी आसा. ताका लागून ते निवृत्ती उपरांत खाजगी नोकऱ्यो करतात. अणभवाचो फायदो समाजाक दितात. ते अजूनय खाजगी क्षेत्रांत शिक्षण, प्रशिक्षण, वेवस्थापन आदीं मळार वावुरतात.
सेवा दिवपाचे दोन फायदे आसात. पयलीं परस उणो पगार दिवचो पडिल्ल्यान आस्थापनाक बऱ्याक पडटा आनी निवृत्तीवेतनधारकांक आपलो वेळ बरो वता म्हूण मानसीक समाधान मेळटा. हाचे भायर कांय प्रमाणांत पयशेय मेळटात. गुजरात सरकारान फाटीं ज्येश्ठ नागरिकांक नोकऱ्यो दिल्ल्यो. अर्थांत, अशीं कामां केल्यार जायत्या तरणाट्यांक नोकरी मेळपाक कळाव जातलो आनी तांची कुशळटाय फुकट वतली, अशें कांय लोकांचें मत.
कांय खाजगी आस्थापनांनी कर्मचारी निवृत्त जातकच त्याच पगाराचेर काम करतात, पूण तांकां पेन्शन बी मेळना. एकूण निवृत्तीची पिराय वाडोवची काय आसा तशी दवरची, ह्या विशयाचेर वेगवेगळीं मतां आसात.
शांताराम वाघ
96234 52553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
