भांगरभूंय | प्रतिनिधी
भांगरभूंय । प्रतिनिधी
काणकोणः श्रीस्थळ पंचायतीचे ग्रामसभेंत अपेक्षे प्रमाण वादग्रस्त निविदा प्रक्रियेचेर वादळी चर्चा जाली. पंचायत मंडळान 14 कामां खातीर काडिल्ल्या निविदेंची सरकाराच्या दक्षता खात्या वरवी चवकशी करपाची तशेंच पंचायत मंडळाच्या फाटल्या पांच वर्सांच्या कारभाराची चवकशी करपाची मागणी करपी थाराव पास केलो.
उद्देगीक वसणुकेंतले बंद आशिल्ले उद्देग, राना हक्क दावे, घर नंबर, उप भलायकी केंद्र, पंचायत वाठारांत चलपी कॅसिनो सारके जुगार, कोयर प्रकल्प, कोमुनिदाद जमनीचेर केल्लीं बेकायदो बांदकामां अश्या विशयाचेर चर्चा जाली. कांय विशय सभापती रमेश तवडकार हांचे कडेन चर्चा करून ते सुटावे करपाचें थारलें.
पंचायत मंडळाचे निविदे प्रक्रियेंत व्हडा प्रमाणांत गैरवेव्हार तशेंच अफरातफर जाल्या. ताची म्हायती दिवपाची मागणी प्रताप तुबकी हांणी केली. मात ताका जाप मेळ्ळी ना. ते खातीर दक्षता खात्या वरवीं चवकशी तुबकी हांणी करतकूच आरोप- प्रत्यारोप जाले. ग्रामसभेचे सुरवेक अभिनंदनाचे थाराव पास केले. सरपंच सेजल गांवकार नवीन आशिल्ल्यान तिचे वतीन आदलो सरपंच आनी सध्याचो पंच गणेश गांवकार हांणी कामकाज पळयलें. निमाणे सेजल गांवकारान उपकार मानले आनी ग्रामसभा सोपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
