भांगरभूंय | प्रतिनिधी
आयज बाजारपेठ बंद; मोबायल टॉवर कुशीक काडपाचें कंपनीचें आस्वासन
म्हापशें: साळगांव मतदारसंघांतल्या नेरूल वाठारांत भरवस्तींत उबारिल्ल्या मोबायल टॉवराक थळाव्या लोकांनी विरोध केला. ह्या टॉवराच्या रेडिएशनाक लागून गांवांत दुयेंसां पातळटलीं असो दावो तांणी केला. हो टॉवर कुशीक काडले बगर शांत बसचे नात असो निश्चेव करून आयज (बिरेस्तारा) सकाळीं ह्या टॉवराचे सुवातेर एकठांय येवपाचो उलो गांवांतल्यान लोकांक मारला. तशेंच गांवांतली बाजारपेठ बंद दवरपाचें आवाहन लेगीत केलां.
हालींच उबारिल्ल्या ह्या टॉवराक लोकांनी विरोध केला. फाटले कांय दीस थळाव्यांनी ह्या टॉवरा आड आवाज काडला. बुधवारा सकाळीं थळावे लोक एकठांय जावन टॉवराच्या प्रतिनिधींक जाप विचारून धारेर धारले. घडणूक थळा वयल्यान हो टॉवर ताकतिकेन कुशीक काडचो अशी मागणी तांणी केली. हाका लागून हांगासरलें वातावरण तापलें.
मजगतीं, बुधवारा वातावरण तापिल्ल्यान बार्देसचे मामलेदार राजाराम परब आनी साळगांव मतदारसंघाचे आमदार केदार नायक हे घडणूक थळार दाखल जाले. पर्वरी पुलीस स्टेशनाचे पुलीस निरिक्षक अनंत गांवकार, उपनिरिक्षक सीताराम मळीक हांणी वांगड्या बरोबर जमावाक समजावन आडायिल्लो रस्तो मेकळो केलो. कंपनीच्या प्रतिनिधींनी ह्या तिडकल्ल्या लोकांक समजावपाचो यत्न केलो. निमाणें ह्या प्रतिनिधींनी टॉवराचें काम थांबयतात अशें आस्वासन दिलें.
हे विशीं आमदार केदार नायक हांणी दिल्ले म्हायती प्रमाण, गोंय सरकारान पांच हजार टॉवर उबारपा खातीर दिल्ल्या परवान्यांतलो हो एक टॉवर आशिल्लो. उबारणे पयलीं थळाव्यांक वा पंचायतीक योग्य सुचोवण्यो दिवप गरजेचें आशिल्लें. पूण तशें केल्लें ना.
ज्या वेळार खणपाचें काम सुरू आशिल्लें तेन्ना बोअरवेल बांदतात अशी म्हायती दिली. उपरांत ह्या खड्ड्याचो आकार वाडले उपरांत शौचालया खातीर टांकी बांदतात अशें सांगलें. उपरांत एका रातयांत थंय मोबायल टॉवर उबारलो.
ह्या टॉवराक वाडटो विरोध लक्षांत घेवन कंपनीन येता त्या दोन दिसांत मोबायल टॉवर कुशीक काडपाचें आस्वासन दिलां. ताका लागून हो टॉवर कुशीक काडटले असो म्हाका विस्वास आसा अशें आमदार केदार नायक हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.