भांगरभूंय | प्रतिनिधी
प्रत्येक कामांत शिस्त, प्रामाणीकपणा जाय. नाजाल्यार तें सारकें जायना. सरकारी मळाचेर साबार कडेन बेशिस्त दिसता. ताका लागून ताचो गैरफायदो लोक घेतात. तांकां दुसऱ्यांचें कांय पडिल्लें नासता. स्वताचो सुवार्थ सादलो काय जालें. गोंयच्या पर्यटन मळाचेर आमकां हें चांटये पावलाक पळोवपाक मेळटा. ताचो धपको आयज ना फाल्यां बसतलो, हाची दरेकल्यान जाणीव दवरपाक जाय. नाजाल्यार सद्दां एक भांगराचें तांतीं दिवपी कोंबी मारून त्या काणयेंतल्या हावरट मनशान स्वताचेंच लुकसाण करून घेतलें, तशी आमची गत जातली. गोंय हें पर्यटन राज्य, तेंय देशांतलें पयल्या क्रमांकाचें हें सरकारान, वेवसायीक आनी लोकांनीय विसरूंक फावना. फक्त खावप, पिवप, मजा करप जांकां आवडटा, तेच पर्यटक हांगा येतात, हो गैरसमज
गोंयकारांक पुसून उडोवचो पडटलो. जांकां शांतताय, सैम आवडटा, तेय लोक व्हडा संख्येन हांगा येतात. देखून आमकां गोंयचें नांव सांबाळचें पडटलें.
सरकारान पर्यटन मळ नितळ करपाक काल कांय पावलां उबारल्यांत, ताका येवकार दिवचो पडटलो. मेळटा थंय रांदप, कोयर करप, भीक मागप, पर्यटकांक सतावप, सामान विकप…. अशे साबार प्रकार म्हणल्यार उपद्रव, अशें सरकारान जाहीर केलां. ह्या निर्णयाक लागून बेजारिल्ल्या पर्यटकांक थाकाय मेळटली, अशी आस्त. मात, जे कितें निर्णय घेतल्यात ते सारके चालीक लागपाक जाय. घोशणा केली, मागीर खंयचे कडेन कांय ना, असो प्रकार जावचो न्हय…. आनीक हे बेशिस्त प्रकार जातात कित्याक ताचोय सोद पयलीं घेवचो. 5 ते 50 हजारां मेरेन दंड दितले. पूण, हें सगलें ते पर्यटक गोंयांत भीतर सरतात, थंयच तांकां कळपाक जाय. गोंयांत कशें वागपाक जाय, कितें करपाक मनाय आसा, ताची म्हायती चेकनाक्याचेर, विमानतळाचेर, रेल्वे स्टेशनाचेर पर्यटकांक मेळपाक जाय.
गोंयांत तरणाटे पर्यटक येतात, ते आमी विदेशांतूच वतात, हे भावनेन येतात. तशें कांयशें वातावरणूय हांगा आसा. आयले काय मागीर तांकां सोरो, चिकन- मटण, नाचप, गावप, संगीत जाय पडटा. ड्रग्सा खातीरुय येवपी आसतले! बंगी जंपिग, उदकांतल्यो स्पीडबोटी, पॅराशूट, बलून… सगलें पळयतकच ते भुल्लुसता. उदका खेळ खेळप चुकीचें न्हय. पूण सुरक्षा नासल्यार जीव वगडावपाची भिरांत आसता. कांय वर्सां पयलीं द. गोंयांत वाॅटर स्पोर्टस खेळटना पर्यटकाक मरण येवपाची घडणूक घडिल्ली. त्या वेळार संबंदीत वाॅटर स्पोर्टस चालका कडेन परवानोच नाशिल्ल्याचें उक्ताडार आयिल्लें. हाचो स्पश्ट अर्थ, कांय सरकारी अधिकाऱ्यांचीं, थळाव्या लोकप्रतिनिधींचीं बोल्सां भरून हे खेळ चलतात. नाजाल्यार कोणूय उठून दर्यावेळेर येता, आपल्या स्पीड बोटींनी पर्यटकांक दर्यांत भोंवडायता, अशें जावचें ना. सगले एकमेकांक सामील आसले बगर हें शक्यूच ना. तेन्ना पर्यटन खातें, पुलीस, थळावी पंचायत हांकां हे बेशिस्तीचेर लक्ष दवरचें पडटलें.
पर्यटन थळांचेर, रस्त्या कुशीक रांदप, जेवतकच उश्टें, कोयर थंयच सांडून वचप हें आतां सदचेंच जालां. ह्या पर्यटकांक हाॅटेलां परवडनात अशें म्हणपाचें? राज्यांतलीं सगल्योच खाणावळी, हाॅटेलां कितें म्हारग नात. दुसऱ्यांच्या गांवांत वचून अशें वागप बरें न्हय. अनधिकृत फेरीवालेय जळामळा दिश्टी पडटात. तांचेरूय निर्बंध जाय. सरकारान परवानगी दिल्ले गाळे, दुकानां, शॅक्स आसतना हे लोक दर्यावेळो, बसस्टॅण्डांचेर फिरप चुकीचें. तातूंत चडशे लोक राज्या भायले आसात. मसाज, कपडे, सौंदर्य प्रसाधनां आनी हेर जायत्यो गजाली घेवन हे विक्रेते भोंवतात. तांचे पसून सरकाराक, पंचायतींक कितें फायदो जाता, तें तांकांच खबर आसतलें. बरें, तांचे कडेन परवानो तरी आसा? दुसरी गजाल, दर्या वेळांचेर कांयजाणांक गिरायकूय जायना. तरीय ते झेतान दुकानां चलयतात, हाचे फाटलेंय गुपीतूय पुलिसांनी सोदून काडपाची गरज आसा.
सोरो पियेवप्यांचो उपद्रव वाडला. बार्रांनी पिवप्यांक चड जाली जाल्यार आतां बारधनी खंय गाडयेन घरा पावयतले. पूण, ह्या बेबद्यांचें कितें? तातूंत कांय भिकारी, गुंड प्रवृत्तीचे आसात. पर्यटन राज्य म्हूण नांव राखपाचें आसा जाल्यार तांचो बंदोबस्त पयलीं जावंक जाय. भिकाऱ्यांक इफ्फीच्या दिसांनी पणजी शारा भायर धांवडावपाचो निर्णय प्रायोगीक तत्त्वाचेर कांय वर्सां पयलीं जाल्लो. मागीर तो फसलो. आतां दर्या वेळांचेर, शारांनी जळीमळीं भिकारी दिसतात. हातूंत गुन्यांवकारांचे खबरीय आसूं येतात. सरकारान घेतला तो निर्णय बरो. पूण तो योग्य पद्दतीन चालीक लागतलो तेन्नाच खरो. तुमकां कितें दिसता?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
