भांगरभूंय | प्रतिनिधी
भांगरभूंय । प्रतिनिधी
पणजीः स्ट्रीट प्रोव्हिडन्स ट्रस्ट हे बिगर सरकारी संस्थे वतीन बेघर, अपंगुळ, दुयेंत आनी हेर निऱाधार लोकां खातीर सांगोल्डें हांका मुफत फिजिओथॅरपी केंद्र सुरू केलां आनी सोमाराक (22 ऑगस्ट) ताचें उक्तावण जातलें. 150 चौखणी मीटर सुवातेंत हें केंद्र आसा आनी तातूंत ऍरकंडिशन हॉलांत दोन कायम फिजोओथॅरपीस्ट कामाक आसतले.
बायलो आनी दादल्यांचेर स्वतंत्रपणान मुफक फिजिओथॅरपी उपचार करतले. सकाळ आनी सांजे अश्या दोन सत्रांत हें काम करतले. ऑर्थोपॅडीक, जनरल, सायक्रेटिस्ट तज्ज्ञ पयलीं वेळ घेवून उपलब्द जातले अशें स्ट्रीट प्रोव्हिडन्साचो संस्थापक डोनाल्ड फर्नांडीस हांणी सांगलें.
सोऱ्याचे भकीक पडिल्ल्यांक चलपा खातीर फिजिओथॅरपीची गरज आसता. उत्तर गोंयांतल्या आमच्या शेल्टरांत आशिल्ल्याक ही सेवा मुफत मेळटली. ह्या उपचारा खातीर पशये दिवपाची तांक नाशिल्ल्यांक लेगीत ती मुफत दितले अशें फर्नांडीस हांणी सांगलें. स्ट्रीट प्रोव्हिडन्साची कळंगुटे, पर्वरी, अस्नोडें आनी गिरी हांका मेळून पांच शेल्टर होम आसात. थंय बायलो आनी दादले मेळून 90 जाण आसात.
दक्षीण गोंयांत केळशी आनी केंपें हांका शेल्टर होम बांदपाची येवजण आसा. राज्यांत फिजिओथॅरपी केंद्रां चलोवपा खातीर सरकार समाज कल्याण खात्या वरवीं निधी दिता. आमी आमचे कडेन आशिल्ल्यांक मुफक जेवण, तपासणी आनी वखदां दितात अशी म्हायती फर्नांडीस हांणी दिली.
उत्तर आनी दक्षीण गोंयांत मुफत हॉस्पिटलां सुरू करपाची ट्रस्टाची येवजण आसा. आरीचो अॅटेक आयिल्ल्यान बरें जावपा खातीर फिजिओथॅरपीची गरज आसा. जंय आसा थंय तांचेर फिजिओथॅरपी करची पडटा. ते खातीर आमी फिजिओथॅरपिस्टांची नेमणूक केल्या अशें फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
