भांगरभूंय | प्रतिनिधी
डॉ. जयंती नायकः कोंकणी कला केंदान भेटयली निवृत्ती उपरांतल्या जिविताक शुभेत्सा
भांगरभूंय । खबरां मेज
पणजीः कोंकणी साहित्याची निर्मणी आनी लोकवेदाचें संशोधन आपूण निमाण्या खिणां मेरेन करतली, अशें नामनेची कोंकणी साहित्यीक, लोकवेद अभ्यासक डॉ. जयंती नायक हांणी सांगलें.
गोवा कोंकणी अकादेमीक 33 वर्सांची सेवा दिवन डॉ. नायक ऑगस्टाच्या निमाण्या सप्तकांत निवृत्त जाली. ते निमतान तांणी केल्ल्या सेवाभावी वृत्तीची केल्ल्या कृतीशील वावराची दखल घेवनकोंकणी कला केंद्र कुडचडेंच्या वांगड्यांनी तिची तिच्या आमोणें केपेंच्या घरा भेट घेवन फुडल्या जिविता खातीर शुभेत्सा दिल्यो. ह्या वेळार केंद्राचे वांगडी अशोक नायक, एन. सुहास, दिलीप नायक, आशिश करमली आनी पंढरीनाथ सुरसुरे हांचे आस्पाव आशिल्लो.
निवृत्ती उपरांत लेगीत तांचे कडल्यान कोंकणी भाशेची सेवा घडची, अशीय तांणी आस्त उक्तायली.
40 वर्सां परस अदीक काळ डॉ. नायक हांणी कोंकणी भास, साहित्य आनी लोकवेदाचो भोवमान करपाक दिल्लो. तांची 50 परस अदीक पुस्तका उजवाडाक आयल्यांत. कोंकणी भाशेंत तांणी पीएचडी घेतल्या. कोंकणी भाशेच्या सर्जनशील साहित्या खातीर आनी अणकारा खातीर साहित्य अकादेमीचो पुरस्कार जोडपी वेंचीक साहित्यिकां मदली ती एक. कोंकणी कला साहित्य केंद्र कुडचडेंची अध्यक्ष म्हूण 2013 ते 2015 मेरेन तांणी वावर पळयिल्लो. फाटलीं दोन दसकां परस चड काळ केंद्राचे वावुरपी समितीचेर ती वावुरता. कोंकणी साहित्यीक, वावुरपी आनी विद्यार्थ्यांची ती प्रेरणास्त्रोत आसा, अशें कोंकणी कला साहित्य केंद्रान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
