भांगरभूंय | प्रतिनिधी
पणजी, प्रतिनिधी : साष्टीवाडो- बोड्डें, दिवचले एक घर फोडून देवार्यांतल्यो चांदीच्यो मुर्ती आनी हेर मोलादीक वस्तू चोरल्या. ही चोरी ४ नोव्हेंबराक राधिका मिलिंद शिरोडकार (५४) हांच्या घरांत जाल्ली. दिवचल पुलिसांनी दीपकुमार श्रीवास्तव हाका नवी दिल्लीक वचून धरलो. ताका धरपा खातीर पुलिसांनी तीन दिसांचो सांपळो रचिल्लो. ही चोरी करपाक आसपाव आशिल्ले ताचे हेर दोग वांगड्यांक पुलीस सोदतात.
४ नोव्हेंबराक सांजेवेळार ६.४० ते ५ नोव्हेंबराक सकाळीं ९.३० वरां मेरेनच्या काळांत तिच्या घरांत चोरांनी प्रवेश केल्लो. देवार्यांत दवरिल्ल्यो चांदीच्यो ६ मुर्ती आनी दोन मोलादीक हारशे चोरले, अशी कागाळ राधिका शिरोडकार हांणी आयज दिवचल पुलिशेंत केल्ली.
मजगतीं, पुलिसांनी हे चोरयचो तपास घेवपाक सुरू केलें. तांणी गोंयच्या सगळ्या चोरयो आनी चोरांची वळेरी तपासली. तेन्ना अशे तरेचीच चोरी वास्कोय जाल्ली हें मुखार आयलें. अमिर शेख (रा. शिरसय, थिये) ह्या चोरान ही चोरी केल्ली हें उक्ताडार आयिल्लें. उपरांत अमिर शेखाचे कॉल डिटेल्स आनी बँक अकावंट दिवचल पुलिसांनी तपासले. जेन्ना दिवचले चोरी जाल्ली त्या दिसा शेख हांच्या बँक अकावंटाचेर दिपकुमार श्रीवास्तव हांणी २० हजार रुपया ट्रान्सफर केल्ल्याचें पुलिसांक कळ्ळें. तेन्ना शेखाचें लोकेशनूय बोर्डे- दिवचल दाखयल्लें, हें स्पश्ट जालें.
पुलिसांनी शेख हाची चवकशी केली. उपरांत तो दिल्लीक आशिल्ल्याचें कळ्ळें. ते प्रमाण दिवचल पुलिसांनी नियोजन करून ताका नवी दिल्लीक जेएनयू विद्यापीठाच्या गेट लागसारा अटक केलो. गोंय पुलिसांक दक्षीण- पश्चिम दिल्लीच्या पुलिसांनी मजत केली. तीन दीस चोराचो पाठलाव करून तो निमाणो पुलिसांचे तावडेंत सांपडलो. ताची चवकशी केली तेन्ना शेख हांणी चोरी केल्ल्याचें कबूल केलें. तशेंच हेर दोग वांगड्यांचोय आसपाव आशिल्ल्याचें तांणी सांगलें. पुलिसांनी ताका गोंयांत हाडला. तशेंच न्यायालयान श्रीवास्तव हाका पांच दिसांची बंदखण फर्मायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
