भांगरभूंय | प्रतिनिधी
मडगांव : फातोड्डें स्टेडियम बांदिल्लो ते सुवातेर रावपी स कुटुंबांचें पुनर्वसन केल्लें. मात, तांकां ते सुवातेचो मालकी हक्क अजूनय दिवंक नासलो. आमदार सरदेसाय हांचे सयत ह्या कुटुंबांनी मुख्यमंत्री डॉ. सावंत हांची भेट घेतले उपरांत ‘म्हजें घर’ हे येवजणेंतल्यान ह्या कुटुंबांक सुवातेचो मालकी हक्क दितले, अशें मुख्यमंत्री सावंत हांणी सांगलें.
पं. जवाहरलाल नेहरु स्टेडियमावेल्या पश्चीम वटेनच्या स्टँडाक आदले मंत्री फ्रान्सिस्को मोंत क्रुझ हांचें नांव दिलां . हे कार्यावळीक मुख्यमंत्री डॉ. सावंत हाजीर आशिल्ले. फातोड्डेंच्या एसटी समाजांतल्या स कुटुंबांच्या सुवातेच्या मालकीचो प्रस्न जायती वर्सां जालीं प्रलंबीत आशिल्ल्यान आमदार सरदेसाय हांणी मुख्यमंत्री सावंत हांचे कडेन कुटुंबांची भेट घालून दिली. 1989 वर्सा कुटुंबांचें पुनर्वसन केल्लें. तरी फाटलीं 35 वर्सां तांकां मालकी हक्क मेळूंक नाशिल्ल्याचें कुटुंबीयांनी मुख्यमंत्र्यांक सांगलें.
जंय ह्या कुटुंबांचें घर आसा, ती सुवात आनी भोंवतणचे दोन मिटर सुवातेचो मालकी हक्क दितले, अशें आस्वासन मुख्यमंत्र्यान दिलें.
खेळां संचालक अजय गावडे हांकांय सुवात दिल्ल्याचीं कागदपत्रां, हेर कागदपत्रां घेवन प्रक्रिया सुरु करच्यो. उपरांत सुवातेची सनद दिवची, अश्यो सुचवण्योय तांणी केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
