भांगरभूंय | प्रतिनिधी
फोंडें, प्रतिनिधी: तारीवाडो – शिरोडेंच्या सरकारी मुळाव्या विद्यालयची धोको निर्माण करपी ते इमारतीच्या पांख्यार बांदकाम खात्या वतीन पत्रे घालून तात्पुर्ती वेवस्था केल्या. मात मोडपाक पाविल्लें हें पांखें आजूनय धोक्याचें आसा. भाग शिक्षण अधिकारी उमा कुंकळयेंकार हांणी बातमी प्रसिद्ध जाले उपरांत हे इमारतीची पळोवणी करून बांदकाम खात्याक कितेंय उपाय करपाक सांगिल्ल्यान रोखडीच हे विशीं दखल घेतली. मात पत्रे घालून तात्पुरती वेवस्था केल्या तरी धोको निर्माण करपी पांखें आनी ओल्यो वणटी कोसळपाचो धोको आसा. ताका लागून पालक भुरग्यांक वर्गांत धाडचे परस बहिश्कार घालपाची शक्यताय वाडल्या.
विद्यालयाच्या इमारतीची सामकी बाबत अवस्था जाल्ली. इमारतीचे नळे माकडांनी फोडिल्ल्यान हे इमारतींत पावसाचें उदक येतालें. पांख्यांतल्यान उदक ओतिल्ल्यान ओल्यो जाल्ल्यो इमारतीच्यो वणटी कोसळपाचो भंय आसा. इमारतीचे एके वटेनचें पांखें कोसळपाचे वाटेर आशिल्ल्यान अंगणवाडीच्या वट्ट १० भुरग्यांक सध्या घराच दवरपाचो वेळ पालकांचेर आयला. जाल्यार पयली ते चवथेच्या वट्ट १८ विद्यार्थ्यांक विद्यालयाच्या वरांड्यांत शिक्षण दितात. पालक शिक्षक संघा वतीन विद्यालयाची दुरुस्ती करपाची निवेदनां फाटलें वर्सभर तीन – चार फावटीं दिल्लीं. मात ताची बांदकाम खात्यान दखल घेवंक नाशिल्ल्यान पावसाचें उदक विद्यालयांत भितर सरून सगळ्याक गळटी लागिल्ली.
सुत्रां कडल्यान मेळिल्ले म्हायती प्रमाण, पालकांनी इमारत दुरुस्ती करपाचें निवेदन दिले उपरांत देड वर्सा आदीं बांदकाम खात्याच्या अभियंत्यांनी दुरुस्ती करपा खातीर धाडिल्ली फायल आजून मंजुरीची वाट पळयता. पांख्यार पत्रे जरी घाले तरी नळे केन्नाय वर्गांत कोसळपाक शकतात. शेनवारा पत्रे घालपाक आयिल्ल्या कर्मचार्यांनी धोको निर्माण करपी पांख्याचो अणभव घेतलो. तेन्ना ओल्यो जाल्ल्यो वणटीय कोसळपाचें दिसून आयलें.
मजगतीं, कितेंय व्हड घडणूक घडचे पयलीं भुरग्यांचे वर्ग खंयच्याय घरांत घेवपाची मागणी पालक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
