भांगरभूंय | प्रतिनिधी
मेयर करंड इंदौर आंतरराष्ट्रीय बुद्दीबळ सर्तीचे पयले आवृत्तीचो किताब गोंयचो आंतरराष्ट्रीय मास्टर नितीश बेलुरकारान आपल्या नांवार केलो. ताणें धा फेरयेंतल्यान 8.5 गूण मेळयले. ताणें सर्तींत एक लेगीत हार घेवंक ना.
सर्तींत अझरबैजान, जॉर्जिया, किर्गिझस्तान, पोलंड, उझबेकिस्तान, नेपाळ, बांगलादेश, भारत आनी फिडे ह्या 9 फेडरेशनच्या 217 खेळगड्यांचो आस्पाव आशिल्लो. तशेंच 16 ग्रॅण्डमास्टर, 21 आंतरराष्ट्रीय मास्टर, सात वुमन आंतरराष्ट्रीय मास्टर, 13 फिडे मास्टर, चार वुमन फिडे मास्टर आनी 2 वुमन ग्रॅण्डमास्टर हांणी वांटो घेतिल्लो.
नितीशाक तीन लाख रुपया आनी करंड फावो जालो. सर्तींत वट्ट 33 लाख रुपयांचीं इनामां दवरिल्लीं. नितीश हो जिनो फार्मास्युटिकल्साचो ब्रॅण्ड अॅम्बासेडर आसा. तो कुजिरांतल्या एस एस धेंपो कॉलेज ऑफ कॉमर्स अॅण्ड इकॉनोमिक्साचो विद्यार्थी आसा.
2611 कामगिरी सयत नितीशाचें रॅटींग 24.3 गुणांनी वाडलें. नितीशान दोळे दिपकावपी प्रदर्शन करतना ग्रॅण्डमास्टर दीप सेनगुप्ताक (भारत), फिडे मास्टर ऋत्विक परब (भारत), फिडे मास्टर हर्ष सुरेश (भारत), ग्रॅण्डमास्टर दीपन चक्रवर्ती (भारत), ग्रॅण्डमास्टर अरण्यक घोष (भारत) आनी आंतरराष्ट्रीय मास्टर वियानी डिकुन्हा (भारत) हांकां हारयले.
मजगतीं, गोंयच्या अमेय अवदीक इकरावी आनी ऋत्विक परबाक 13वी सुवात फावो जाली. मंदार लाडान 5.5 गुणां सयत 80वी आनी एथन वाझाक 82वे सुवातेर समाधान मानचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
