भांगरभूंय | प्रतिनिधी
विश्वजीत राणेः बिनविरोध वेंचून आयिल्ल्या उमेदवारांक परबीं
भांगरभूंय । प्रतिनिधी
वाळपयः समाजांत आनी पंचायतींत किल्लोस करपी उमेदवारांक पयस दवरात. ते वेंचून आयल्यार ताचे वायट परिणाम फुडारांत गांवाचे उदरगतीचेर जावपाक शकतात. ताका लागून नितळ चारित्र्याच्या उमेदवारांक वेंचून दियात, असो उलो भलायकी मंत्री विश्वजीत राणे हांणी मारलो.
सत्तरी म्हालांतल्या वट्ट 12 पंचायतींच्या वेंचणुकांनी वट्ट 10 उमेदवार बिनविरोध वेंचून आयल्यात. आमदार दिव्या राणे हांचे हाजिरेंत मंत्री राणे हांणी तांकां फुलांचे हार घालून परबीं दिली. आपल्या कार्यालयांत आपयिल्ले बसकेंत ते उलयताले.
फुडल्या पांच वर्सांत आपापाल्या प्रभागांतल्यो समस्या, अडचणी पयस करपाचो दरेकल्यान यत्न करचो. वेंचून आयिल्लो दरेक पंच लोक लोकांचो आसता. खंयचेच बाबतींत तिडक मनांत दरिनासतना आपूण सगळ्यांचोच पंच हे भावनेन उदरगतीक चालना दिवची. 10 ऑगस्टाक जावपी पंचायतींच्या वेंचणुकांनी सक्रीय उमेदवारांक संद दियात, असो उलो मंत्री राणे हांणी ह्या वेळार मारलो. दिव्या राणे हांणी सांगलें, पंचायत ही ग्रामीण वाठाराचे उदरगतीची म्हत्वाची बुन्याद. ही बुन्याद घट करपाची आसा जाल्यार बरे उमेदवार वेंचून येवप खूब गरजेचें. हेच खातीर पंचायत वेंचणुकांनी मतदारांनी विचार करून मतदान करचें आनी बरे उमेदवार वेंचून हाडपाक आदार करचो.
बिनविरोध वेंचून आयिल्ले उमेदवार
सोमनाथ काळे (म्हावूस), सरिता गांवकार, निलेश परवार, सुभाष गावडे (ठाणे), मनिषा पिळयेंकार, उदयसिंग राणे, (भिरोंडें), राजश्री जल्मी (पिसुर्लें), शिवाजी देसाय (सांवड्डें), सुमेधा माडकार (होंडा) आनी नितेश गावडे (गुळेली).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
