भांगरभूंय | प्रतिनिधी
मडगांवः नावेले इगर्जेंत प्रार्थना सोंपून घरा परतपी एके जाण्टे बायलेची भांगराची सरपळी चोरून व्हेली. हे घडणुकेंत सुमार 1.20 लाख रुपया मोलाची भांगराची सरपळी मोटार सायकलीन आयिल्ल्या चोरांनी चोरली. हे संबंदी मडगांव पुलिशेंत कागाळ नोंद जाल्या.
आयतारा सकाळीं नावेलेच्या डोंगरी हांगा रावपी इनोसेंट गोम्स (61 ) सकाळीं साडेआठ वरांचेर प्रार्थने खातीर इगर्जेंत गेल्ली. प्रार्थने उपरांत सकाळीं साडेणवां ती घरा परततना पर्पेचुअल सर्कल लागसार सायकला कडेन पावतांच मोटार सायकीवेल्यान वेगान आयिल्ल्या चोरांनी तिच्या गळ्यांतली सरपळी कोंचून काडली आनी थंयच्यान पळून गेले.
हे घडणुकेन इनोसेंट गोम्स रस्त्यार पडली आनी तिका सायकलाची नंबर प्लेट लेगीत पळोवंक मेळ्ळी ना. उपरांत तिणें आनी तिचो घोव डोमिनिक फर्नांडीस आनी समाजीक वावुरपी ऍड. प्रतिमा कोटीन्हो हांणी मडगांव पुलीस स्टेशनांत येवन कागाळ दाखल केली.
अॅड. प्रतिमा कुतिन्हो हांणी ही घडणूक पूर्वनियोजीत आशिल्ल्याचें म्हणलां. दुचाकीवेल्या चालकान हेल्मेट घाल्लें आनी ते गोम्स हांचेर पाळत दवरून आशिल्ले. तांकां एकटी पळोवन चोरी केली. ह्यान पयलीं नावेले सांजेवेळार पासयेक गेल्ले 74 वर्सां पिरायेचे बायलेची भांगराची सरपळी चोरिल्ली. नावेले वाठारांत भांगराच्यो सरपळ्यो चोरपी चोरांचो एक गट सक्रीय जाला आनी हाचेर नियंत्रण दवरपाची गरज आसा. तशेंच ज्येश्ठ लोकांनी घरा भायर सरतना काळजी घेवची असो उलो अॅड. कुतिन्हो हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
