भांगरभूंय | प्रतिनिधी
दिवचल: देवूळवाडो नार्व्यां एका 72 वर्सां पिरायेचे जाण्टे बायलेच्या आंगार माड पिडल्ल्यान तिका मरण येवपाची घडणूक 17 ऑक्टोबर दिसा दनपारां घडली. सविता चंद्रकांत वेंगुर्लेंकार अशें ते बायलेचें नांव आसा.
मेळिल्ले म्हायती प्रमाण ही घडणूक सोमारा 12.30 वरांच्या सुमाराक घडली. मयत सविता ही आपल्या घराचे फाटले वटेन आयिल्ल्यो. थंय लायिल्ली भाजी काडीत आसतना नेमको त्याच वेळार तिच्या आंगार शेजारच्या कुळागरांतलो माड हुमटून पडलो.
हो माड पडिल्ल्याचें तिच्या घरा कुशीक नरकासूराची प्रतिमा तयार करपी भुरग्यांनी पळयलो. त्या माडाचीं आडसरां, नाल्ल बी मेळटले हे आशेन भुरगीं त्या माडा कडेन धांवून गेलीं. तेन्ना तांकां ही बायल माडाच्या चुडटांनी दिश्टी पडली. ती थंय तशी दिशिल्ल्यान एकूच धांवपळ जाली.
हे घडणुकेची खबर पातळटकूच आशिकुशीचे लोक धांवून आयले. सविता हांकां उबारून गाडयेंत घालून हॉस्पिटलांत व्हेली. पूण दोतोरांनी तांकां मरण आयिल्ल्याचें जाहीर केलें.
तांचे कुडीचेर सांजवेळा निमाणे संस्कार केले. हे घडणुकेक लागून वाठारांत दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
