भांगरभूंय | प्रतिनिधी
21- 24 मे मेरेन लक्ष्मीनारायण देवस्थान, नार्वें, दिवचले हांगां नूतन मुर्ती प्रतिश्ठापना आनी मंदीर जिर्णोद्धार सुवाळो जातलो. ते निमतान…
गोंयच्या दिवचल तालुक्यांतल्या शांत, सैमाचो आशीर्वाद आशिल्ल्या नार्वे गांवांत श्रीलक्ष्मीनारायण देवूळ उबे आसा. जायत्या पिळग्यां सावन हें देवूळ गोंयच्या गुजराती समाजा खातीर श्रद्धा आनी पुजेचें केंद्र जालां. ती फकत एक इमारती न्हय, तर आमचे भक्ती, परंपरा आनी खोल भावनीक संबंदांचें घर.
देवस्थानाचो अध्यक्ष म्हूण, आमच्या देवळाच्या जिवितांतली एक सगळ्यांत भावनीक आनी इतिहासीक घडणूक सांगपाक म्हाका भोवमान आनी नमळाय दिसता. आमच्या भगवान लक्ष्मीनारायणाचीं 800 वर्सां पोरणी मूर्त बदलपाचो सुवाळो जातलो. ह्या देवळाची उत्पत्ती इ. स. 1650 वर्सा जाल्या, जेन्ना दीवचो गुजराती वेपारी सागरजीभाई सेठ हाका सागर तळ्यांत बुडिल्ल्या मुर्तीचो साक्षात्कार जालो. वांगडी गुजरातींच्या आदारान ताणें ही पवित्र देवता स्थापीत करपा खातीर नार्वेंत मूळ लक्ष्मीनारायण देवूळ बांदलें. तेन्ना सावन शेंकड्यांनी वर्सां जाल्ल्या बदलांतल्यान जगपी हें गोंयच्या गुजराती समाजाचें अध्यात्मीक घर जालां. आमी पिळग्यां सावन पुजतात ती मूर्त 900 ते 1200 वर्सां पोरणी आसपाचो अदमास आसा. ताचो पृष्ठभाग भगवान विष्णूच्या धा अवतारांच्या दैवी प्रतिमेचेर कोरांतिल्लो आसा. पूण पिराये प्रमाण ह्या फातराक वेरो पडपाक लागलीं- देवळाच्या विश्वस्तांक आनी भक्तांक चिंता आशिल्ली. ती फकत एक मूर्त नाशिल्ली; ती आमच्या आध्यात्मीक जिणेचें काळीज आशिल्ली. पुर्विल्ली मूर्त बदलप हो केन्नाच सादो निर्णय आसना. कडक धर्मीक मार्गदर्शन, भावनीक संबंद आनी इतिहासीक जापसालदारकी हांचे वरवीं ताचें प्रशासन चलता. वैदिक विद्वान, वरिश्ठ भक्त आनी आध्यात्मीक जाण्ट्यां कडेन व्यापक सल्लो घेतले उपरांत आमी सादूरतायेन मूळ मूर्तीचे सुवातेर पारंपरीक विधींनी कोरांतिल्ली आनी पवित्रतायेन भरिल्ली अचूक प्रतिकृती घालपाचो संकल्प केलो.
हो निर्णय वयले वयर घेतलो ना. सगळ्यांत म्हत्वाचें म्हणल्यार, ती सांबाळपाची कृती आशिल्ली- फुडल्या पिळगे खातीर पुजेची राखण आनी सातत्य सुनिश्चीत करतना देवतेची आध्यात्मीक अखंडताय तिगोवन दवरप. प्राण प्रतिष्ठा पद्दती प्रमाणें करतले. देवळाची बांदावळ ताच्या आदल्या वास्तुशिल्पीय वैभवा कडेन परतून हाडप तितलेंच म्हत्वाचें जालां. गोंयभरांतल्या गुजराती समाजाच्या सामुहीक प्रयत्नांक लागून हो उपक्रम यशस्वी जालो आनी परंपरेक सांबाळपाक वांगड मेळ्ळो.
सप्तकोटेश्वर देवळांत येवपी आनी वचपी भव्य पालखी मिरवणूक हें देवळाच्या पंचांगांतलें एक खाशेलपण. हाचो शेवट प्रतिकात्मक हरि-हर भेटींत जाता, जो भगवान शिव आनी भगवान विष्णू हांच्या दैवी संयोगाचें प्रतिनिधीत्व करता आनी हिंदू देवळांत सुसंवादाचेर भर दिता. म्हज्या पदाधिकाऱ्यां वतीन, 21- 24 मे मेरेन लक्ष्मीनारायण देवस्थान, नार्वें, दिवचले हो सुवाळो जातलो, तातूंत विविध धर्मीक विधी आयोजीत केल्यात. महाआरती, महाप्रसाद जातलो. एके पुस्तिकेचेंय प्रकाशन जातलें. ह्या सुवाळ्याक व्हडा प्रमाणांत सगल्यांनी हाजीर रावपाचें हांव तुमकां सगल्यांक आमंत्रण दितां.
मुकेश देसाय
अध्यक्ष, श्रीलक्ष्मीनारायण देवस्थान,
नार्वे- दिवचल
77588 67089
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
