भांगरभूंय | प्रतिनिधी
आयज 6 सप्टेंबराक नार्वेंची अश्टम. सांगचें म्हळ्यार मसण देवीचे जात्रे भशेनूच ती मनयतात. कारण ती दिसा उजवाडी सुरु करून सांज जाता म्हणसर सोंपयतात.
श्रावण म्हयन्यांत आमी जायतें सण, उत्सव मनयतात. ताचे फाटल्यान इतिहासीक तशेंच विज्ञानीक कारणां लेगीत आसात. तर श्रावणांत येवपी सण म्हळ्यार नार्वें गांवांत जावपी अश्टम. जी हेर गावां परस वेगळे तरेन मनयतात. हाका भुतांची जात्रा लेगीत म्हणटात. श्री मसण देवीचे जात्रे उपरांत, अश्टम दुसरे दीस वा दोन दिसांनी मनयतात. अंदूं मसण देवीची जात्रा आनी अश्टम फाटो-फाट आयल्या. काल 5 सप्टेंबराक मसण देवीची जात्रा जाली. आयज 6 सप्टेंबराक अश्टम. सांगचें म्हळ्यार मसण देवीचे जात्रे भशेनूच ही अश्टम मनयतात. कारण ती दिसा उजवाडी सुरु करून सांज जाता म्हणसर सोंपयतात. गांवचे लोक म्हणटात, अश्टमी कडेन उपरांत भुतांची जात्रा भरता. ताका लागून थंय मागीर कोण रावनात वा वचनात.
जंय ही अश्टम भरता त्या जाग्याक तिर्थार अशें म्हणटात. तिर्थक्षेत्र म्हळ्यार जंय तीन न्हंयो व्हांवतात {त्रिवेणी संगम} ताका लागून इतलो पवीत्र हो गांव. गांवचे वर्णन करता तितलें कमी. अश्टमी दिसा श्री काळोबा देवाची पुजा करतात. ताका कासाळ्याच्या खोल्यान गुठलायल्लो बेल, तुळशी आनी फुलां ओंपतात. दर्शनाक लोक लांबच्या लांब रांको करतात. लागींच्या देवस्थानांतल्यो पालख्यो अश्टमी दीस तिर्थक्षेत्रार येतात. श्री शांतादुर्गेची दिवचल साकून, श्री पिसो रवळनाथाची, श्री कणकेश्वरीची, गिमोणची पालखी पिळगांवची, श्री सप्तकोटेश्वराची आनी हेर पालख्यो येतात. तांच्या खातीर जागो आसा तो आतां बांदून काडला. थंय पालख्यो दवरपाक पेड आसा. दीसभर ह्यो पालख्यो थंय रावतात आनी लोकांक दर्शन दितात. अखेरेक सगळ्यो पालख्यो तीर्थ न्हातात आनी आयिल्ले वटेन देवळांत वतात. ह्यो पालख्यो वर्सांन –वर्स पारंपरीक रितींतल्यान रानांतल्यान येतात आनी वतात.
अश्टमी दिसा चणें आनी भिकणां खूब म्हत्वाचीं. कारण मेल्ल्यांक हांगा काळोबाचें घुमटे फुडें जळयतात. तर त्या घरकारांचें कुटूंब तांकां ह्या दिसा कागदार चणें दवरता. समज कोणूय जात्रेक येवपाक पावलो ना जाल्यार दुसऱ्या मनशाक सांगूंन तरी पयशें दिवन थंय चणें दवरपाक लायतात. आमकां थंय त्या लोकांच्या नांवांन कुशीक तुळशीच्यो शिळा बांदिल्यो दिश्टी पडटात. हेर दिसांनी लोक हांगा येनात. फक्त मरणाच्यो विधी करपाक येतात. पूण अश्टमी दिसा हांगा लोकांची ह्या पवित्र स्थानार गर्दी जाता. तशेंच तिर्थक्षेत्रार कांय जाणां अभिशेक करतात. सुतापुनवेक घाल्लें जानवें हांगां न्हंयेंत सोडटात.
अश्टमी दिसा मांड येतात. कोण साठां विकतात, देवाचें पाट, खाजें- चणें, खेळण्यांचें मांड, काकणाचें मांड आदी. अश्टमीक येवपी पणसाचीं साठां सामकीं फामाद. कांय खिणां भितर हीं साठां खपतात. इतलीं रुचीक आसता तीं साठां. ह्या एकूच दिसा लोकांक हाडपाक, व्हरपाक फेरयेची वेवस्था केल्ली आसता. आखड्या वयलें, कुंमारजुंवें आनी दिवाडे साकून मुजरत लोक नार्व्यां येतात. दिवाडे म्हळ्यार आमचो देववाडीचो जुंवो. ह्या दोनूय गांवांचें लागींचें नातें. श्री सप्तकोटेश्वर देववाडी साकून बाटाबाटीच्या वेळार नवें नार्वें हांगां पावलो. खुबशें लोक अश्टमी दीस फेरयेंत बसून पासय मारतात. हरशीं ह्या जाग्यार कोण वचनाच, पूण त्या दीस हो पुराय वाठार गर्देन भरिल्लो आसता. पुराय गोंयांत नार्वेंची ही अश्टम आगळी- वेगळी अशीच.
प्राजक्ता गांवकार
कोनाटी- नार्वें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
