भांगरभूंय | प्रतिनिधी
‘मनोहर’ बदला येवकार दिता ‘न्यू गोवा’ विमानतळ
भांगरभूंय । प्रतिनिधी
पेडणें: पेडणें म्हालांतल्या मोपा आंतरराष्ट्रीय ग्रीनफिल्ड विमानतळ प्रकल्पाचे 11 डिसेंबराक प्रधानमंत्री नरेंद्र मोदी हांचे हस्तुकीं लोकार्पण जालें. ह्या प्रकल्पाक मनोहर आंतरराष्ट्रीय विमानतळ अशें नांव दिलें. पूण पेडणें म्हालांतल्या राष्ट्रीय म्हामार्गाचेर खूब कडेन लायिल्ल्या तकट्यांचेर अजून लेगीत न्यू गोवा आंतरराष्ट्रीय विमानतळ मोपा अशें नांव दिश्टी पडटा. मनोहर आंतरराष्ट्रीय विमानतळाचो एकूय तकटो अजून मेरेन रस्त्याचेर लावंक नाशिल्ल्यान मोपा विमानतळाक अखेर कोणाचें नांव दिलां, असो दुबाव निर्माण जाला.
मोपा विमानतळाचें नामकरण केले उपरांत जीएमआर कंपनीन आदले तकटे काडून रोखडेच मनोहर आंतरराष्ट्रीय विमानतळ अशे तकटे लावप गरजेचे आशिल्ले. पूण ते नदरेन अजून मेरेन कसलींच पावलां उखलूंक नाशिल्ल्यान विमानतळाच्या नांवा विशीं लोकां मदीं गैरसमज पातळटा.
विमानतळाक दिल्ल्या मनोहर ह्या नांवा वयल्यान कांय जाणां मदीं वाद सुरू आसा. कांय जाणांच्या मता प्रमाण विमानतळाक मनोहर पर्रीकार अशें पुराय नांव दिवपाक जाय आशिल्लें. मनोहर नांवा वयल्यान खूब जाणांच्यो आरत्यो परथ्यो प्रतिक्रिया आयकुपाक मेळटात. आदले उपमुख्यमंत्री मनोहर आजगांवकार हांणी प्रतिक्रिया दितना आपलेंय नांव मनोहर आशिल्ल्याचें सांगपाक ते फाटीं रावले नात. तोरशेचे आदले सरपंच सूर्यकांत तोरस्कार हांणी प्रतिक्रिया दितना सांगलें, जे तरेन मांडवी न्हंयेचेर बांदिल्ल्या तिसऱ्या पुलाक अटल सेतू अशें नांव दिला. अटल सेतू म्हणलें उपरांत आमकां अटल बिहारी वाजपेयी हांचोच उगडास जाता. तेचवरी मनोहर ह्या नांवा वयल्यान मनोहर पर्रीकार हांचोच उगडास जातलो. विर्नोड्याचे आदले सरपंच भारत गावडे हांणी प्रतिक्रिया दितना सांगलें, सरकारान फेरविचार करून मोपा विमानतळाचें मनोहर पर्रीकार आंतरराष्ट्रीय विमानतळ अशें नामकरण करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
