नातलां मेरेन भारतांत 5G इंटरनॅट

भांगरभूंय | प्रतिनिधी

यूट्यूब वा फेसबुकाचेर व्हिडिओ पळयतना तुमकां बफरिंगचो त्रास जाता? जर जाप हय आसत जाल्यार रोखड्योच तुमच्यो सगल्यो समस्या सोंपपाच्यो आसात. ऑगस्टाचे अखेरेक ‘5G’ इंटरनेट सेवा भारतांतल्या ग्राहकांक मेळटली. तशी घोशणा दूरसंचार मंत्री अश्विनी वैष्णव हांणी केल्या. हे खातीर गरजेच्या आशिल्ल्या स्पेक्ट्रमाची विक्री सुरू जाल्या. जून मेरेन ती प्रक्रिया पूर्ण जावपाची शक्यताय आसा. ‘5G’ लाँच जाले उपरांत इंटरनेटाचो वेग कितलो आसतलो. लोकांचे जीणेचेर कितें परिणाम जातलो. हाची म्हायती रोखडीच मेळटली.
अश्विनी वैष्णव हांणी 5G इंटरनेट लाँच करपा विशींची महत्त्वाची म्हायती दिली. तांणी सांगलें, मे महिन्यांत पावणे विशीं डिजिटल कम्युनिकेशन समितीची (डीसीसी) बसका जातली. ही दूरसंचार मळा वयली निर्णय घेवपी सगल्यांत व्हडली संस्था.
वैष्णव हांणी सांगलें, विभाग ट्रायच्या शिफारशींची वाट पळयता. ट्रायन सरकाराक 1 लाख मेगाहर्ट्झ स्पेक्ट्रमाची 7.5 लाख कोटी रुपयांक पावणी करपाची शिफारस केल्ली. ताची वैधताय 30 वर्सां आसतली. प्रक्रिया सुरू जाल्या. पावणी सोंपतकच 5G लाँच करतले. सध्या तसले फोन विकप सुरू जालां.
इंटरनेटा खातीर वापरिल्ली ‘G’ म्हणजे जनरेशन वा पिळगी. पयले पिळगेच्या इंटरनेटाक 1G म्हणटात. 1979 त सुरू जाल्ल्या इंटरनेटाक 1G जनरेशन अशें म्हणटाले. ताचो 1984 मेरेन संवसारांत विस्तार जाल्लो. 1991 त 2G इंटरनेट लाँच जालें. ताचो वेग 1G परस चड आशिल्लो. 1G चो वेग 2.4 Kbps तर 2G इंटरनेटाचो वेग आतां 64 Kbps जाला. उपरांत 1998 त 3G इंटरनेट, 2008 त 4G आनी 2019 त 5G इंटरनेट लाँच जालें. 2019 तूच 5G इंटरनेट लाँच केलां तरी 11 वर्सां उपरांत तें भारतात सुरू जातलें.
4G आनी 5G इंटरनेट वेगळें कशें?
इंटरनेट नेटवर्काच्या पांचवे पिळगेक 5G म्हणटात. ही एक वायरलेस ब्रॉडबँड इंटरनेट सेवा, जी लहरीं वरवीं हाय-स्पीड इंटरनेट सेवा प्रदान करता. हातूंत तीन प्रकाराचे फ्रिक्वेन्सी बँड आसात.
लो फ्रिक्वेन्सी बँड – विशिष्ट मळाच्या व्याप्तींत उत्कृष्ट, इंटरनेट स्पीड 100 Mbps,
मिड फ्रिक्वेन्सी बँड- इंटरनेटाचो वेग लो फ्रिक्वेन्सी बँडा परस 1.5 Gbps चड , विशिष्ट मळाच्या व्याप्तींत लो फ्रिक्वेन्सी बँडा परस कमी, सिग्नलाचे नदरेन बरे.
हाय फ्रिक्वेन्सी बँड- इंटरनेट गती 20 Gbps, सगल्यांत कमी क्षेत्र कव्हर, सिग्नलाचे नदरे बरे.
तीन व्हडल्यो खासगी दूरसंचार कंपनीं भारती एअरटेल, रिलायन्स जिओ आनी व्होडाफोन-आयडिया भारतांत 5G इंटरनेट सेवा सुरू करपाक वावुरतात . तांणी एरिक्सन, नोकिया वांगडा मोबाइल अ‍ॅक्सेसरीज तयार करपाचें काम सुरू केलां. डिसेंबरांत देशांतल्या 13 शारांनी 5G इंटरनेट सुरू जातलें. नोकिया आनी एरिक्सन कंपनींनी ट्रायल, टेस्टिंग सुरू केलां. जंय इंटरनेट वापरप चड जाता, त्या 13 शारांनी पयलीं ही सेवा मेळटली.

सर्वसामान्यांक फायदो कितें?
5G इंटरनेट सेवा सुरू केल्ल्यान देशांत बरेच बदल जातले. लोकांचें काम सोंपें जातलेंच, पूण मनोरंजन आनी दळणवळणाच्या मळांतूय खूब बदल जातले. 5G खातीर काम करपी एरिक्सन कंपनीला विश्वास आसा की, 5 वर्सांनी भारतांत 500 दशलक्ष 5G इंटरनेट वापरपी जातले. 5G सुरू केल्ल्याने किते फायदे जातले?
पयलो फायदो म्हणजे वापरकर्ते जलद गतीन इंटरनेट वापरूंक शकतले.
व्हिडिओ गेमिंगाच्या मळार 5G क लागून व्हडले बदल जातले.
YouTube वयले व्हिडिओ बफरिंग जायनासतना चलतले.
व्हॉट्सअ‍ॅप कॉलमांत स्पश्ट आवाज येतलो.
सिनेमा 20 ते 25 सेकंदांत डाउनलोड जातलो.
शेतांचे देखरेखी खातीर ड्रोनाचा वापर शक्य
मेट्रो आनी ड्रायव्हरा बगर गाडी चलोवंक मेळटली
व्हर्च्युअल रिअ‍ॅलिटी आनी कारखान्यांनी रोबोट वापरप सोंपें जातलें.
5G क लागून इंटरनेट ऑफ थिंग्जाच्या माध्यमांतल्यान चडांत चड संगणक प्रणाली जोडूंक मेळटल्यो.