भांगरभूंय | प्रतिनिधी
पैंगीणी कोंकणी नाट्य महोत्सवाचें आयोजन
काणकोण: नवे पिळगेन नाटकांत आवड दाखोवंक जाय. नाट्य परंपरा तिगोवन दवरपा खातीर अशे तरेच्या नाट्य महोत्सवाची सामकी गरज आसा अशें ज्येश्ठ नाट्य कलाकार आनी किर्तनकार निशाकांत टेंगसे हांणी सांगलें. ह्या वेळार तांणी विवीध नाटकाचे इतिहास प्रेक्षकां मुखार दवरले.
गोवा कोंकणी अकादेमीच्या पालवान काणकोण कोंकणी कला केंद्रान पैंगीणच्या श्रद्धानंद विद्यालया कुशीक कोंकणी नाट्य महोत्सवाचें आयोजन केलां. ह्या नाट्य महोत्सवाच्या उक्तावण सुवाळ्या वेळार ते उलयताले.
ह्या सुवाळ्याक मुखेल सोयरे म्हूण काणकोणचे आमदार आनी सभापती रमेश तवडकार, पैंगीण पंचायतीच्यो सरपंच सविता तवडकार, कोंकणी अकादेमीचे उपाध्यक्ष वसंत भगवंत सावंत, सचीव मेघना शेटगांवकार, निमंत्रक श्रीधर कामत बांबोळकार, काणकोण कोंकणी कला केंद्राचे अध्यक्ष सुरज कोमरपंत, उपसरपंच सुनील पैंगीणकार, पंचायत वांगडी सतीश पैंगीणकार, प्रवीर भंडारी माचयेर हाजीर आशिल्ले. मानेस्तांनी दिवली पेटोवन नाट्य महोत्सवाचें उक्तावण केलें.
ह्या वेळार उलयतना सभापती रमेश तवडकार हांणी सांगलें, आयज कांय सुवातींनीच हौशी नाट्य परंपरा सुरू आसा, अशा नाट्या महोत्सवांतल्यान प्रेरणा घेवन नाटकाची ही परंपरा सुरू दवरपा खातीर तरणाटे पिळगेन फुडाकार घेवचो.
ह्या वेळार सविता तवडकार, श्रीधर कामत बांबोळकार हांचींय उलोवपां जालीं. नाटकाचे परिक्षक सुदेश नायक, कमलाकर म्हाळशी, कविंद्र फळदेसाय हांकां मानेस्तांचे हस्तुकीं यादस्तीक भेटयलें.
येवकार सुरज कोमरपंत हांणी दिलो. वसंत भगवंत सावंत हांणी प्रास्तावीक केलें. कार्यावळीचें सुत्रसंचालन शिरीष पै हांणी केलें. उपरांत ‘कुत्रे’ ह्या नाटकाचो प्रयोग जालो. काल इतिहास .कॉम हें नाटक जालें. आयज जागो मोहन प्यारे, 24 वेर लीअरान जगचे काय मरचे जाल्यार 25 तारखेक सेल्फी हें नाटक जातलें.
नाटक सद्दां 7.30 वरांचेर सुरू जातले. नाट्यमोगींनी ह्या नाटकाचो आनंद घेवचो अशें आयोजकांनी कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
