नांवांत खूब कितें आसा

भांगरभूंय | प्रतिनिधी

मोपा विमानतळाच्या नांवा वयल्यान समाजमन दुशीत जावचें ना, हाची खबरदारी दोनूय वटेनच्या फुडाऱ्यांनी घेवची. ह्या वादांतल्यान बेगीन सुवर्णमध्य काडल्यार बरो.

गांवांत अचकीत गाडयांचो ताफो घुसता. बेगोबेग सगले गांवकार एकठांय जातात. मंत्री, सरकारी अधिकारी आयिल्ले आसता. मंत्री गांवकारांक कितें तरी सांगता. पूण, कोणूच आयकुपाचे मनस्थितींत नासतात. तेन्ना गांवचो मुखेली उबो रावता आनी म्हणटा, ‘आरे पापयांनो, आयकात मरे. सायब, इतल्या पयसुल्ल्यान गांवांक नवें नांव दवरपाक आयल्यात. उदरगतीच्या कामाक अशीं आडमेळीं हाडूं नाकात.’
आमी सगले भारतीय भावराती, संवेदनशील. आमच्यो श्रद्धा, भावना केन्ना उंचाबळ जायत वा दुखावत तें प्रत्यक्ष आमी पसून सांगपाक शकचे नात. गांवाक नवें नांव दवरप, तें बदलप, संस्थेक अमूकच नांव जाय म्हणप हाचे वयल्यान आमी भारतीय साबार फावटी भावनाविवश जाल्यात. धरणें, आंदोलन इतलेंच न्हय तर मारामारी, हाणामारी पसून केल्या. न्यायालयांनी केशी घाल्यात. घडये फाटल्या 75 वर्सांच्या काळांत अशा ‘बारश्यां’ क लागून सरकार पसून पडलां आसतलें. फाटले कांय दीस गोंयांत मोपा विमानतळाक कोणाचें नांव दिवपाचें हाचेर वाद चल्ला. भोवतेकांचो पयले मुख्यमंत्री भाऊसायब बांदोडकार हांच्या नांवाक तेंको आसा. मगो पक्षान तर थारावूच घेवन भाऊच्या नांवाचो आग्रो धरला. तसो थाराव प्रधानमंत्री, मंत्र्यांक धाडला. मगोचे सर्वेसर्वा सुदिन ढवळीकार हांणीय भाऊचें नांव मोपाक दिवपाक जाय. मनोहर पर्रीकार हांचें नांव दाबोळी विमानतळाक वा नव्या झुआरी पुलाक दिवचें, अशी मागणी केल्या. तर कांय जाण म्हणटात, जॅक सिकेर. भाजपान ह्या वादा उपरांत अजून आपली नांवा विशींची अधिकृत भुमिका जाहीर करूंक ना. आतां पेडण्यांतल्या पंचायतींनी, मगो पक्षान तशेंच भाजपाच्या विरोधांत आशिल्ल्या चडश्या फुडाऱ्यांनी भाऊच्या नांवाक पसंती दिल्ल्यान सरकारा मुखार पेच निर्माण जाला. विमानतळ प्राधिकरणाच्या संचालकान नांव दवरपाचो अधिकार केंद्र सरकाराक आसा, अशें स्पश्ट करून सरकारा वयलो ताण इल्लो उणो केला खरो, पूण भाऊचें नांव विमानतळाक दिवंक ना, जाल्यार सध्या धुंवरेवपी वाद पेटून उजो लागूं येता.
बरोच काळ पदार उरिल्ले सगलेच फुडारी उदरगतीचीं कामां करतात. भाऊसायब गोंय मुक्त जाले उपरांतचे पयले मुख्यमंत्री. तांचे मुखार चड कठीण आव्हानां आशिल्लीं. शुन्यांतल्यान विश्व निर्माण करपाचो तांणी यत्न केलो. विलिनीकरणाचो तांचो मुद्दो चुकलो. उपरांत हें मान्य करपा इतलें तांचें काळीज व्हडलें आशिल्लें. विलिनीकरणा वटेन आसूनय लोकांनी मगो पक्षाक, पर्यायान भाऊंक वेंचून दिले. हाचे वयल्यान ते लोकप्रीय फुडारी आशिल्ले, हें सांगपाक नाका. कला अकादमी, झुआरी, शिपयार्ड, एमआरएफ… ताचे परस सरकारी मुळाव्यो शाळा सुरू करपाचें व्हडलें कार्य तांणी केलें. मनोहर पर्रीकार हे हालींचे पिळगेक खबर आसात. विरोधी पक्ष फुडारी आनी उपरांत मुख्यमंत्री म्हूण तांणी धडाकेबाज कामगिरी केल्या. दूरदिश्टीन साधनसुविधा उबारपाचें काम तांणी केलां. संरक्षण मंत्री म्हूणय तांणी केंद्रांत काम केलां. अशें भाग्य मेळपी ते पयले गोंयकार. आतां ह्या दोनूय फुडाऱ्यांचे, सत्तेर आसतना तांणी घेतिल्ल्या निर्णयांचे समर्थक आसात, तशेच विरोधकूय. तेन्ना मोपा विमानतळाच्या नांवा वयल्यान समाजमन दुशीत जावचें ना, हाची खबरदारी दोनूय वटेनच्या फुडाऱ्यांनी घेवची. ह्या वादांतल्यान बेगीन सुवर्णमध्य काडल्यार बरो. कारण चड करून 19 डिसेंबराक विमानतळाचें उक्तावण जातलें.
नांव दिलें वा ना दिलें म्हूण ह्या नेत्यांचें कर्तृत्व ल्हान जावचें ना. विमानतळाक नांव दिलें तरी तें लोकां मदीं घोळटलेंच अशेंय ना. मुंबय छत्रपती शिवाजी महाराज हांच्या नांवाचो उल्लेख सीएसटी असो जाता. फातोड्डें स्टेडियमाक पं. नेहरूंचें नांव दिलां, हें खुद्द थंयच्या खेळगड्यांक खबर आसचें ना. मांडवी पुलाचें नांव कितें? औरंगाबाद आनी उस्मानाबादाचें नांव बदल्लां. नवीं नांवां कितल्या जाणांक याद जातात?
आदल्या तेंपार गांधी, नेहरू आनी 1-2 नांवां सोडल्यार काँग्रेसीक दुसरीं नांवां सुचनाशिल्लीं. संबंदीत फुडाऱ्याची याद उरची, ताच्या कर्तृत्वाक मानवंदना दिवची म्हूण सरकारी प्रकल्पांक, येवजण्यांक तांचीं नांवां दितात. तांचे फोटे लायतात, पुतळे उबारतात.
मात हाचे फाटल्यान मतांचें राजकारणूच चड आसता, अशें दिसून आयलां. त्या फुडाऱ्यांचे विचार, आदर्श कोण घेनात. मोपाच्या नांवा संबंदीचो आग्रो हो भाऊं वयल्या मोगाक लागून जाता. नांव दवरपाचो अधिकार केंद्राक आसा, अशें जाहीर केल्ल्यान आतां बाॅल केंद्र सरकाराच्या कोर्टांत पावला. सध्या तरी भाऊंचें नांव मुखार आसा. चड करून तेंच नांव विमानतळाक मेळटलें. मोपा विमानतळ म्हूण ताचो सध्या बारसो जालाच. रोमियो अॅण्ड ज्युलियट नाटकांत लेखक विलीयम शेक्सपियरान बरयलां, ‘नांवांत कितें आसा?’ तो आयज आशिल्लो जाल्यार ती ओळ बदलून ‘नांवांत खूब कितें आसा,’ अशें बरोवपाचो!!