भांगरभूंय | प्रतिनिधी
पर्यटन उद्देगांत शिस्त हाडपा खातीर जेटी धोरण
पणजी : जेटी धोरणांत नव्यो जेटी बांदपाचो कसलाचे उद्देश ना. जेटी बांदपाचे अधिकार पर्यटन खात्याक नात, ते कॅप्टन ऑफ पोर्टाक आसात. जेटींचो पर्यटना खातीर चडांत चड वापर जावपा सयत पर्यटनांत शिस्त हाडपाचो उद्देश धोरणा फाटल्यान आसा. पर्यटन मंत्री रोहन खंवटे हांणी ही गजाल स्पश्ट केल्या.
प्रुडंट खबरां चॅनला वयले ‘हेड ऑन’ कार्यावळींत पर्यटन मंत्री रोहन खंवटे उलयताले. ह्या वेळार तांणी जेटी धोरणा विशीं बऱ्योच गजाली स्पश्ट केल्यो.
सरकारान जेटी धोरणाचो मसुदो उक्तो करतना संबंदितां कडल्यान हरकती आनी सुचोवण्यो मागयल्यात. मसुदो उक्तो जाले उपरांत जेटी धोरणाक विरोध जावपाक लागलो. रापणकारांचो एकवोट संघटणेन जेटी धोरणाक विरोध केला. नव्यो जेटी जाले उपरांत नुस्तेमारीक आडखळ येतली. जेटी धोरण नुस्तेमाऱ्यांच्या विरोधांत आशिल्ल्यान ताका विरोध आशिल्याचे रापणकारांचो एकवोट संघटणेन म्हणलां. हे फाटभुंयेर जेटी धोरणांत नव्यो जेटी बांदपाचो उद्देश ना. जेटींचो पर्यटना खातीर वापर कसो करचो, हाचो आस्पाव आसा, अशें पर्यटन मंत्र्यान सांगलें.
सरकारान जेटी धोरणाचो मसुदो जाहीर केला. हो मसुदो निश्चीत जावंक ना. लोकांच्यो हरकती तशेंच सुचोवण्यांचो विचार करून जेटी धोरण थारतलें. नुस्तेमार तशेंच हेर संबंदितां कडेन चर्चा करपाची आपली तयारी आसा. ह्या धोरणा विशीं अपप्रचार सुरू आसा. कांय लोक दिशाभूल करतात, असो आरोप रोहन खंवटे हांणी केला.
नव्यो जेटी बांदपाचो हेत ना
नव्यो जेटी बांदपा खातीर जेटी धोरण आंखलां, असो सर्वसामान्य समज आसा. विरोध करपी तशेंच संबंदितांनी जेटी धोरणाचो मसुदो वाचचो. ताचो अभ्यास करचो आनी उपरांत उलोवचे. जेटी धोरणा खाला नव्यो जेटी बांदपाचो प्रस्ताव ना. सध्या ज्यो जेटी आसात, तांचो पर्यटना खातीर वापर जायना. पर्यटना खातीर जेटींचो चडांत चड वापर जावचो, हो हेत आसा. सध्या राज्यांत बऱ्योच जेटी आसात. कांय जेटी वापराविणें आसात. सांता मोनिका, कॅप्टन ऑफ पोर्ट, बेती आनी बिठ्ठोण ह्या जेटींचो पर्यटना खातीर वापर जाता. सांता मोनिका जेटी सोडली जाल्यार हेर जेटींचो पर्यटना खातीर फावो त्या प्रमाणांत वापर जायना. पर्यटन वाडोवपा खातीर जेटींचो वापर जावपाक जाय. तो जावपा खातीर जेटी धोरणाचो मसुदो आसा. हाका जेटी पर्यटन धोरण अशें म्हणपाक हरकत ना. जेटी धोरणाचें नांव बदलपाची सरकाराची तयारी आसा.
जेटी बांदपाचो अधिकार पर्यटन खात्याक ना
नव्यो जेटी बांदपा खातीर तरेकवार खात्यां कडल्यान मान्यताय घेवची पडटा. जेटी बांदपाक मान्यताय दिवपाचे अधिकार कॅप्टन ऑफ पोर्टा कडेन आसा. पर्यटन खात्याक हो अधिकार ना. जेटीचे कसलेच अधिकार पर्यटन खात्याक नात. हाका लागून नव्यो जेटी बांदपा खातीर धोरण आसा, हो गैरसमज काडून उडोवपाची गरज आसा.
जेटीक लागून नुस्तेमाऱ्यांक आडखळ ना
सध्या जे तरेन नुस्तेमारी सुरू आसा, ती तशीच सुरू उरतली. परंपरीक नुस्तेमाऱ्यांक जेटींची कसलीच आडखळ जावची ना. जेटींचेर शिस्त हाडपाची गरज आसा. जेटींची उदरगत जातली. हाचो नुस्तेमाऱ्यांक लाव जावप शक्य आसा. नुस्तेमारी संघटणा तशेंच परंपरीक नुस्तेमाऱ्यां कडेन चर्चा करपाची तयारी आसा. तांचें मदीं आशिल्लें गैरसमज पयस जावपाची गरज आसा, अशें रोहन खंवटे हांणी सांगलें.
पर्यटनांत शिस्त गरजेचीं
सध्या सांता मोनिका जेटीचेर पर्यटकांची गर्दी आसता. बरेच पर्यटक सांता मोनिका जेटीचेर येतात. सरकाराक मात त्या प्रमाणांत येणावळ मेळना. जेटीचेर कितले पर्यटक येतात, कितें करतात, हाची नोंद नासता. बेकायदा पर्यटक गायड तयार जाल्यात. पर्यटक गायडांची नोंद ना. पणजे बसस्थानकाचेर वचून गायड पर्यटकां कडेन संपर्क सादतात. ताच्या टुराचें नियोजन करतात. हे गैरप्रकार बंद जावपाक जाय. गायडांची नोंद जावपाक जाय. जेटींचेर कसल्यो सुविधा आसात ताची नोंद आसपाक जाय. पर्यटना मदीं शिस्त येवपाक जाय. पर्यटनाचे सारके नियमन जालें, जाल्यार सरकाराची येणावळ वाडटली. गैरप्रकार बंद जातलें. जेटी धोरण आंखपा फाटल्यान हो उद्देश आसा, अशें पर्यटन मंत्री रोहन खंवटे हांणी सांगलें.
पर्यटना खातीर लेगीत टॅक्सी अॅप लावकारी
संवसारांत नवे तंत्रज्ञान येत आसा. सगल्या वाठारांनी आतां तंत्रज्ञानाचो वापर जावपाक लागला. सगल्यांक अॅप टॅक्सी सेवा सुरू जाल्या. गोंयांत ती सुरू जावप सभावीक. हाचो पर्यटक आनी पर्यटन उद्देगांक लाव जातलो. दर्जेदार टॅक्सी सेवा ही सगल्यांची गरज. ओला, उबर सारक्या अॅपाक टॅक्सीकारांनी विरोध केल्लो. आतां गोंयच्या टॅक्सीकारांचो अॅप सुरू जाता. हाचो गोंयच्या टॅक्सीकार भावांक लाव जातलो, अशें पर्यटन मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
