भांगरभूंय | प्रतिनिधी
भांगरभूंय I प्रतिनिधी
पणजी : गोवा मायल्स अॅप टॅक्सी सेवेचो विमानतळाचेर कावंटर सुरू जाले उपरांत गोवा टॅक्सी हो नवो अॅप सुरू करपाची प्रक्रिया सुरू जाल्या. गोवा टॅक्सी अॅप नव्या वर्सांत सुरू जातलो, अशें येरादारी मंत्री मॉवीन गुदिन्हो हांणी सांगलें.
येरादारी मंत्री मॉविन गुदिन्हो आनी पर्यटन मंत्री रोहन खंवटे हांची मुख्यमंत्री डॉ. प्रमोद सावंत हांचे कडेन बसका जाली. हे बसकेंत नवो अॅप सुरू करपा विशीं चर्चा जाली. आमदार, टॅक्सीकार तशेंच हेर संघटणांक विस्वासांत घेवन गोवा टॅक्सी अॅप सुरू जातलो. टॅक्सीकारां सयत रिक्षा तशेंच मोटारसायकल पायलटांक ह्या अॅपात वांटेकार जावपाची संद आसतली. येरादारी खात्या खाला हो अॅप चलतलो.
गोवा मायल्स अॅप आपणें हाडूंक ना. फाटल्या सरकारा वेळार पर्यटन उदरगत म्हामंडळान गोवा मायल्स कडेन कबलात केल्या. हाका लागून हो अॅप सुरू दवरचो पडटा. गोवा मायल्सान अजून मेरेन बरी सेवा दिल्या. ओला आनी उबर अॅप सेवा सुरू करपाचो विचार आशिल्लो. ओला आनी उबर अॅप सेवेंत कांय आडखळी तयार जाल्ल्यान गोवा टॅक्सी अॅप सुरू करपाचो निर्णय जाला. रातीं आठ उपरांत राज्यांत बस सेवा ना. राती टॅक्सीकार टॅक्सी खातीर चड पयशे घेतात. सुरक्षीत आनी योग्य दरांत टॅक्सी सेवा दिवपा खातीर अॅप सुरू जावपाची गरज आसा. मोपा विमानतळ डिसेंबरांत सुरू जातलो. हो विमानतळ सुरू जातलो, तेन्नाच गोवा टॅक्सी अॅप सेवा सुरू जातली. टॅक्सीकारां खातीर हेर सवलती लेगीत आसतल्यो. सवलती तशेंच हेर अटी हाचे फुडें निश्चीत जातल्यो, अशें येरादारी मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
