भांगरभूंय | प्रतिनिधी
मुख्यमंत्री डॉ. प्रमोद सावंतः पुलाचो निमाणो कुडको जोडलो; आतां मेरेन 1,436 कोटी खर्च
मुरगांवः गोंयांतले रस्ते आनी म्हामार्गाच्या उदरगतीच्या कामां खातीर 22 हजार कोटी खर्च केल्यात. जुवारी न्हंयेचेर बांदिल्ल्या नव्या पुला खातीर आतां मेरेन 1,436 कोटी रुपया खर्च केल्यात. मार्च 2025 मेरेन तो पूल पुराय जातलो, अशी म्हायती मुख्यमंत्री डॉ. प्रमोद सावंत हांणी दिली.
जुवारी पुलाचो निमणो कुडको 30 ऑगस्टाक मुख्यमंत्री डॉ. सावंत हांणी भौशीक बांदकाम मंत्री निलेश काब्राल हांचे हाजिरेंत उखल्लो. मुख्यमंत्र्यांचे हस्तुकीं धर्मीक विधी करून त्या पुलाचो निमणो कुडको बसयलो. ह्या वेळार तांच्या वांगडा भौशीक बांदकाम खात्याचे मुख्य अभियंते उत्तम पार्सेकार, दिनेश गुप्ता, गोंय राज्य उद्देगीक म्हामंडळाचे उपाध्यक्ष दीपक नायक, दिलीप बिल्डकॉनचे उपाध्यक्ष अतुल जोशी, भौशीक बांदकाम खात्याचे तशेंच दिलीप बिल्डकॉनचे हेर अधिकारी हाजीर आशिल्ले.
आशिया खंडांतलो जुवारी पूल हो आगळो असो पूल थारतलो. पुलाच्या निमाण्या पोताचेर हॉटेल आनी विव्हींग गॅलरी उबारतले. आयज ह्या पुलाचो निमाणो कुडको जोडला. नोव्हेंबर मेरेन पुलाची एक बाजू भौशीक वापरा खातीर उक्ती करतले, अशें मुख्यमंत्री डॉ. सावंत हांणी सांगलें.
नोव्हेंबर 2022 मेरेन पुराय जाल्ली पुलाची एक बाजू येरादारी खातीर उक्ती करतले. तशेंच 2025 मेरेन जुवारी न्हंये वयलो नवो पूल पुराय जाले उपरांत आठ वर्सा ह्या पुलाची देखभाल संबंदीत कंपनी करतली, अशें मंत्री काब्राल हांणी सांगलें. केबल स्टेड पुला खातीर केबल्सांची वट्ट संख्या दरेका पुलाचेर 112 नग आसा. हेर विवीध कामां म्हणल्यार डांबर घालप, क्रॅश बॅरियर निश्चीत करप आनी पुलाची चांचणी दोन म्हयन्यांनी करतले. 4 लेन (सिंगल सायड) केबर स्टेड पूल नोव्हेंबर 2022 त उक्तो जावपाची शक्यताय आसा. वेर्णें (टोयोटा शोरूम) ते आगशी मेरेन पुलाची लांबाय 6.334 किलोमिटर आसा. तशेंच आगशी आनी शिरदोण पुलाची लांबाय 7.336 किलो मिटर आसा आनी हो पूल येरादारी खातीर आदींच उक्तो केला, अशी म्हायती संबंदितांनी दिली.
640 मिटर अंतराचो केबल स्टेड पूल
केबल स्टेड पूल हो आठ पदरी आसा. तातूंतलो चार पदरी उजवो वटेन आनी चार पदरी दावे वटेन आसतलो. केबल स्टेड पुला खातीर प्रीकास्ट स्लॅबा सयत स्ट्रक्चरल स्टील सेगमेंटाची वट्ट संख्या दरेका पुलाचेर 53 नग अशी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
