भांगरभूंय | प्रतिनिधी
अखेरेक अपेक्षे प्रमाण द्रौपदी मुर्मू राष्ट्रपती जाली. 21 जुलय हो दीस भारतीय इतिहासांत भांगराच्या अक्षरांनी नोंद जातलो. देशान पयलेच खेप आदिवासी बायलेक आपली राष्ट्रपती म्हूण वेंचून काडल्या. 75 वर्सांच्या काळांतली ती दुसरी बायल राष्ट्रपती. हाचे पयलीं तो भोवमान काँग्रेसीच्या प्रतिभा पाटील हांकां मेळिल्लो. 64 वर्सां पिरायेच्या मुर्मू हांणी आनीक एक विक्रम केला, तो म्हणल्यार स्वातंत्र्या उपरांत जल्मल्ली ती पयलीच राष्ट्रपती. तांकां हाचे पयलीं झारखंडाची पयली बायल राज्यपाल जावपाचोय भोवमान मेळिल्लो.
मुर्मू हांचें नांव उत्तर भारतांतलीं कांय राज्यां सोडल्यार हेर कोणे चडशें आयकूंक नाशिल्लें. तांचो जल्म 20 जून 1958 चो. ओडिशांतल्या मयूरभंज जिल्ह्यांतल्या उपरबेडा गांवांतलो. मितभाशी अशी ही फुडारी. संथाल आदिवासी परिवारांत जल्मल्ल्या मुर्मू हांणी आयज जें पद मेळयलां, तें स्वताच्या बळग्याचेर. तशें तांकां राजकारण नवें न्हय. तांचे बापूय, आजो पंचायतींचे ग्रामप्रधान आशिल्ले. आशीकुशीच्या सात गांवांतल्यान काॅलेजीक वचपी ती पयली चली. शिक्षण पूर्ण जाले उपरांत मुर्मू हांणी शाळेंत शिक्षक म्हूण नोकरी केली. मागीर श्री अरबिंदो संस्थेंत सहायक प्राध्यापक. मागीर कांय काळ उदका शिंपणावळ विभागांत कनिश्ठ सहायक अधिकारी म्हूण काम केलें. ओडीशा विधानसभेंत 2000 आनी 2004 त तांणी नवीन पटनायक हांच्या मंत्रिमंडळांत मंत्री म्हणून येरादारी, नुस्तेमारी खातीं हाताळ्ळ्यांत. भाजपाच्या अनुसुचीत जमात मोर्चाची उपाध्यक्ष म्हूण तांणी काम केलां. 2009 त तांकां लोकसभा वेंचणुकेंत हार घेवची पडली. तांकां वैयक्तिक जिणेंतूय व्हडले धक्के सोंसचे पडले. 2009 त तांचो व्हडलो पूत गेलो, धाकलो पूत 2013 त गेलो आनी घोव 2014 त. तातूंतल्यान सांवरून तांणी फुडली जीण आदिवासींच्या कल्याणा खातीर दिवपाचें थारायलें. उपरांत 2015 त तांची झारखंडाची राज्यपाल म्हूण नेमणूक जाली. तांणी आदिवासीं खातीर खूब वावर केला. 2017 त राज्यपाल आसतना तांणी छोटा नागपूर कूळ अधिनियम 1908 आनी संतथाल परगना अधिनियम 1949 त दुरुस्ती करपाची मागणी करीत झारखंड विधानसभेन मंजूर केल्लें एक विधेयक स्विकारपाक न्हयकार दिल्लो. तेन्ना ती उजवाडांत आयिल्ली. ह्या विधेयकांत जमनींचो मालकी हक्क बदलचो न्हय आनी आदिवासींक तांचे जमनींचो वेवसायीक वापर करपाक परवानगी दिवपाची तांणी मागणी केली. 2016 त रघुबर दास हांच्या फुडारपणा खालच्या भाजपा सरकारान जमनी सोंपेपणी उद्देगीक वापराक हस्तांतर करपाक मेळच्यो, अशा हेतून तें विधेयक तयार केल्लें. तेन्ना व्हडलो बोवाळ जाल्लो. आपल्याच पक्षाचें विधेयक न्हयकारिल्ल्यान आदिवासी समाजांत मुर्मू हांचो मान, आदर वाडलो. आतां 25 जुलयाक मुर्मू सर्वोच्च अश्या राष्ट्रपती पदाचो सोपूत घेतली.
राष्ट्रपती वेंचणुकेंत विरोधी पक्षांकूय धपको दिला. 24 राज्यांतल्या 121 आमदारांनी मुर्मूं हांचे वटेन क्राॅस वोटिंग केलां. जंय काँग्रेस विरोधांत आसा, थंय तें जालां. 17 विरोधी खासदारांनीय मुर्मू हांकां मतदान केलां. आतां भाजपान आपले खाशेले शैलींत आदिवासी लोकनाच, संगीतान नव्या राष्ट्रपतींक येवकार दिला. जे तरेन आयज विरोधकांनी भाजपांत वचपाची सर्त सुरू केल्या, ती पळयल्यार रिकामी जायत वचपी विरोधी पक्षांक फुडल्या विधानसभा, लोकसभा वेंचणुकांनी कठीण दीस येवपाची शक्यताय आसा. अर्थांत भाजपानूय राजकी डावपेच वापरून विरोधी पक्ष मातये भरवण केल्यात, हें न्हयकारपाक मेळचें ना. द्रौपती मुर्मू हांकां 3219 वैध मतांतलीं 2161 मतां मेळ्ळीं. तांचें मोल 5 लाख 77 हजार 777 इतलें आसा. तर यशवंत सिन्हा हांकां 1058 मतां (मोल 2 लाख 61 हजार 062) मेळ्ळीं. जात वयर काडली काय तो संबंदीत व्यक्तीचो अपमान, गुन्यांव थारता. मात राजकारणांत जातींकूच म्हत्व आसा आनी तें वाडत आसा, अशें म्हणलें म्हूण कोणाक वायट दिसचें ना. आदिवासी फुडाऱ्याक उमेदवारी दिल्या हें कळटकच आदिवासी चड आशिल्ल्या वाठारांतल्या भाजप विरोधी पक्षांनी सगल्यांत पयलीं मुर्मू हांकां तेंको दिलो. तोय जाहीर. बऱ्याच काँग्रेस आमदारांनी पक्ष बोल्सांत उडोवन क्राॅस वोटिंग केलें. आदिवासी आनी बायल उमेदवार आशिल्ल्यान चडशे मुर्मू हांचे फाटल्यान रावले. फुडाराक हेंच धोरण विरोधी आनी सत्ताधारी लोकप्रतिनिधींनी बायलांक राजकारणांत 33 टक्के आरक्षण दितना चालीक लावंक जाय. तशेंच दरेका राज्यांत किमान 10 टक्के मंत्रीपदां बायलांक मेळटलीं, हेंय पळोवपक जाय. राष्ट्रपती वेंचणुकेच्या निमतान हें जावचें. भोवमानेस्त राष्ट्रपती द्रौपदी मुर्मू
हांकां परबीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.