भांगरभूंय | प्रतिनिधी
घातपाताचो दुबाव; अनवळख्यां आड पुलीस कागाळ
मुरगांव: नवें वाडें वास्को हांगा नानकनगर वाठारांत सुमार स दुचाकींक उजो लायिल्ल्याची घडणूक मंगळारा फांतोडेर 3.30 वरांचेर घडली. दुचाकी धनयांनी घातपाताचो दुबाव उक्तावन वास्को पुलीस स्टेशनार अनवळख्यां आड कागाळ दाखल केल्या.
वास्को पुलिसां कडल्यान मेळिल्ले म्हायती प्रमाण नवें वाडें वास्को हांगा मंगळारा फांतोडेर 3.30 वरांच्या सुमाराक दुचाकींक उजो लागिल्ल्याची घडणूक घडली. पयलीं चार दुचाकींक उजो लायलो. हातूंत चारूय दुचाकीं लासून गोबर जाल्यो. उपरांत आनीक दोन दुचाकीं उज्यांत सांपडल्यो.
थळाव्यांक हाची सुलूस लागतकूच तांणी उजो पालोवपाचो खर यत्न केलो. पूण चार दुचाकीं लासून गोबर जाल्यो. जाल्यार दोन दुचाक्यांचें थोडें प्रमाणांत लुकसाण जालें.
उज्यांत सांपडिल्ल्या दुचाकीं मदीं अॅक्टिव्हा 125 (जीए 06 एसी 0241), हिरो मायस्ट्रो (जीए 06 जे 9764), होंडा डीओ (जीए 06 एच 0262), अॅक्टिव्हा 125 (जीए 06 क्यू 0915) ह्यो दुचाकी उज्यांत लासून गोबर जाल्यो. जाल्यार हीरो होंडा पॅशन प्रो (जीए 06 एच 1741) आनी पल्सर ह्या दुचाकींचें थोडें लुकसान जाल्ल्याची पुलिसांनी माहिती दिली.
मजगतीं, हे विशीं वास्को पुलिसांक हाची म्हायती मेळटकूच पुलीस घडणूक थळार वचून पंचनामो केलो. दुचाकी धनयांनी हे विशींचो दुबाव उक्तावन वास्को पुलीस स्टेशनार अनवळख्यां आड कागाळ दाखल केल्या. ते प्रमाण वास्को पुलीस स्टेशनाचे सहाय्यक उपनिरिक्षक विठोबा देऊळकार ह्या प्रकरणांत अदीक तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
