भांगरभूंय | प्रतिनिधी
भांगरभूंय । प्रतिनिधी
साखळीः नवभारत निर्मणेची जापसादारी तरणाट्यांनी आपल्या भुजार घेवपाक जाय. विद्यार्थ्यांनी बरें शिक्षण घेवन तांच्या आवडीच्या मळार कुशळताय मेळोवन देशाचें नांव वयर काडपाक जाय. सगल्यांत पयलीं देश अशें मानपाक जाय अशें मुख्यमंत्री डॉ प्रमोद सावंत हांणी साखळे सांगलें. साखळेच्या रवींद्र भवन आनी ई लर्निंग करियर अकादमी वतीन धावे्या विद्यार्थ्यां खातीर आयोजीत केल्ल्या गणित मार्गदर्शन कार्यशाळेचें उक्तावण केल्या उपरांत ते उलयताले.
नव्या शिक्षणीक धोरणात विद्यार्थ्यांक तांच्या आवडीच्या मळार कुशळटाय आत्मसात करपाची वेवस्था आसा. ताचो बरो परिणाम दिसून येतलो. गणित विशयाची विद्यार्थ्यां मदीं आवड तयार करपा खातीर गणित कार्यशाळेचो उपेग जातलो असो हावेस तांणी उक्तायलो. 10वी करिअर घडोवपाची बुन्याद आसा. भुरग्यांनी उण्यात उणे धावे मेरेन शिक्षण घेवपाक जाय. जांका फुडलें शिक्षण घेवप शक्य ना तांचे खातीर आपल्या पांयार उबें रावपा खातीर जायत्यो संद आसात. ज्या मळार काम करपाची इत्सा आसा तातूंत तांणी कुशळटाय मेळयल्यार नोकरी मेळपाचो हुस्को करपाची पाळी येवची ना अशें मुख्यमंत्र्यांनी निमाणे सांगलें. विद्यार्थ्यां कडेन तांणी संवाद सादलो.
कार्यावळीक आत्माराम गांवकार, रवींद्र भवनाचो उपाध्यक्ष विठोबा घाडी, सुनील सिनारी, उमेश सरनायक हाजीर आशिल्ले. सूत्रसंचालन करून प्रताप उगवेकारान उपकार मानले. कार्यशाळेंत आत्माराम गांवकार गणित विशयाचेर भुरग्यांक तीन दीस वेगवेगळे पद्दतीन मार्गदर्शन करतले. साखळी मतदारसंघांतल्या शिक्षणीक संस्थांचे 10वेचे विद्यार्थी हे कार्यशाळेंत वांटेकार जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
