भांगरभूंय | प्रतिनिधी
मंत्री ढवळीकारान वीज पुरवण सुरळीत दवरपाक प्राधान्य दिवचें
पणजी : दिवाळींत नरकासूर लासप ही गोंयची प्रथा. हे प्रथेक प्रोत्साहन दिवन पर्यटकांक आकर्शीत करप गरजेचें. ताका लागून कारण नासतना नरकासूर लासपा वयल्यान राजकारण करपा बदला मंत्र्यान दिव्यांची परब आशिल्ल्या दिवाळींत वीज पुरवण सुरळीत दवरपाचेर भर दिवचो, अशी टिका पर्यटन मंत्री रोहन खंवटे हांणी वीज मंत्री सुदिन ढवळीकार हांचें नांव घेनासतना केल्या.
नरकासूर लासप ही प्रथा समाजाच्या हिताची ना. ताका लागून ही प्रथा बंद जावपाक जाय. नरकासूर तयार करपाक लोकप्रतिनिधींनी अर्थीक निधी दिवप बंद करपाक जाय, अशें वीज मंत्री सुदिन ढवळीकार हांणी बुधवारा म्हणिल्लें.
ते विशीं पत्रकारांनी बिरेस्तारा पर्यटन मंत्री रोहन खंवटे हांकां विचारल्यार, तांणी हाचे वयल्यान ढवळीकार हांचेर टिका केल्या. नरकासूर लासप म्हणल्यार वायट गजाली नश्ट करप. ही प्रथा जायत्या वर्सां पसून गोंयांत सुरू आसा. अशी प्रथा हेर खंयच्याच राज्यांत ना. नरकासूर लासपा प्रमाण गोंयांतलो चिखलकालो, कार्नावाल, बोंदेर, दिपोत्सव अशा कार्यावळींक प्रोत्साहन दिवन चडांत चड पर्यटकांक आकर्शीत करप गरजेचें. ते नदरेन पर्यटन खातें यत्न करता. ताका लागून मंत्र्यांनीच हाचे वयल्यान राजकारण करप चुकीचे, अशें खंवटे हांणी म्हणलें.
नरसकासुरा वयल्यान राजकारण करचे परस दिवाळी परबेच्या दिसांनी वीज पुरवण सुरळीत दवरपाची आनी लोकांची खोस दोट्टी करपाची जापसालदारकी वीज मंत्र्यांची आसून तांणी ती वेवस्थीत सांबाळची, अशेंय मंत्री खंवटे हांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
