भांगरभूंय | प्रतिनिधी
शेताचो जालो व्हाळ; 5 शेतकारांक लुकसाण
भांगरभूंय । प्रतिनिधी
काणकोणः खोतीगांव पंचायतींतल्या नडकें वाठारांत ढगफुटी जाल्ल्यान ओंपिल्लें शेत व्हांवून गेलें. पुराय शेतांत व्हाळ तयार जाला.
हे ढगफुटीक लागून 9 हजार चौखण मिटर शेतजमीन पेड्ड्यार जाली. ह्या शेतांत पांच शेतकारांनी शेत ओंपिल्लें, तें पुराय नश्ट जालें. काणकोणचे मामलेदार कार्यालयांतले सर्कल इन्स्पेक्टर रोहिदास गांवकार हांणी घडणुकेचे सुवातेक भेट दिवन शेतकारांक जाल्ले लुकसाणीचो नियाळ घेतलो.
ढगफुटीक लागून हें लुकसाण जालां. वरिश्ठांक हे घडणुकेची म्हायती दिल्या, अशें गांवकार हांणी सांगलें. गांवकार हांणी दिल्ले म्हायती प्रमाण शेनवारा दनपारां 2.30 ते सांजेच्या 4.30 वरां मेरेन नडके वाठारांत उटंगाराचो पावस पडलो. ढगफुटीक लागून मात थारा नासतना सुमार दोन वरां पावस पडिल्ल्यान शेतांतल्यान उदकाचे लोट व्हावपाक लागले. थंय आशिल्लो आदलो व्हाळ पुरोवन नव्यान शेतांतल्यान व्हाळ तयार जाला. ह्या लोटाक लागून शेतांत माती आनी फांतर सांचल्यात. ताका लागीन आनंद भैरो गांवकार, कृष्णा कुसड वेळीप, सुरेश कुसड वेळीप, मोलू लक्ष्मण गांवकार, संतोष तोळू गांवकार ह्या पांच शेतकारांचें ओंपिल्लें शेत नश्ट जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
