भांगरभूंय | प्रतिनिधी
नगर नियोजन कचेरे भायर आरजीचीं निदर्शनां
पणजी : नगर नियोजन कायद्यांतल्यो प्रस्तावीत दुरुस्त्यो फाटीं घेतल्यो नात जाल्यार खर आंदोलन करपाची शिटकावणी रिव्होल्युशनरी गोअन्स पक्षान दिल्या. आरजीच्या समर्थकांनी 5 हजार हरकती सादर केल्यात. नगर नियोजन कचेरे भायर आरजीच्या समर्थकांनी निदर्शनां केलीं.
रिव्होल्युशनरी गोअन्साचे मुखेली मनोज परब, आमदार विरेश बोरकार तशेंच हेर कार्यकर्ते हाजीर आशिल्ले. नगर नियोजन कायद्यांत दुरुस्ती करपाचो मसुदो नगर नियोजन खात्यान जारी केला. ह्या दुरुस्त्यांक विरोधाची धार वाडत आसा. गोल्फ कोर्स तशेंच प्रकल्पांक मान्यताय दिवपा खातीर ह्यो दुरुस्त्यो आसात असो आरोप आरजीन केला.
शुक्रारा नगर नियोजन कचेरे भायर घोशणा दीत आरजीन निदर्शनां केलीं. ह्या वेळार प्रस्तावीत दुरुस्त्यांक तांणी हरकती सादर केल्यो. कचेरे भायर व्हड प्रमाणांत पुलीस फौज फांटो हाजीर आशिल्लो. पुलिसांनी कचेरेंत सगल्यांक प्रवेश दिवप बंद केल्लो. कांय तेपा उपरांत शिश्टमंडळान नगर नियोजक जेम्स मॅथ्यू हांची भेट घेतली. मनोज परब, आमदार विरेश बोरकार आनी कांय कार्यकर्त्यांनी सीटीपी जेम्स मॅथ्यू हांची भेट घेवन चर्चा केली. नगर नियोजन कायद्यांत दुरुस्ती करपाचो हो प्रस्ताव आसा. अजून कसलोच निर्णय जावंक ना, अशें सीटीपी जेम्स मॅथ्यू हांणी शिश्टमंडळाक सांगलें.
निदर्शनां करपी कार्यकर्त्यांनी उजो, उजो अशें म्हणत घोशणा दिल्यो.
नगर नियोजन खातें, वीज तशेंच उदकाचो विचार करिनासतना प्रकल्पांक मान्यताय दिता. गांवांनी उदकाचो उणाव आसा. रस्ते सारके नात. रस्ते तशेंच उदका खातीर लोकांक न्यायालयांनी वच्चें पडटा. लोकांक विजेचो आनी उदकाचो उणाव जाणावता. नगर नियोजन दुरुस्त्यो फाटीं घेतल्यो नात जाल्यार आंदोलन खर जातलें अशें आमदार विरेश बोरकार हांणी सांगलें.
गोल्फ कोर्स, फिल्म सीटी हांचे सयत सकल वाठारांत बांदकाम परवाने दिवपाचो हेत आसा. घटणे प्रमाण नियोजन थळाव्या संस्थांनी करपाची गरज आसा. दुरुस्तीचो आराखडो पंचायतींनी वचपाक जाय. ताचेर चर्चा जावपाक जाय अशें आमदार विरेश बोरकार हांणी म्हणलें.
मंत्री विश्वजीत राणेची आरजीपीचेर टिका
‘टीसीपी’तली दुरुस्ती तज्ञांच्या सल्ल्यान आनी लोकांक विस्वासांत घेवनूच केल्या. पूण कांय जाण गरजे भायर आरोप करून लोकांक खुबळावन घालतात अशी टिका मंत्री विश्वजीत राणे हांणी सोशल मिडिया वरवीं केली. पर्यावरणाचें संरक्षण करून गोंयची उदरगत सादपाचो यत्न आपूण प्रामाणीकपणान करीत आसा अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
