भांगरभूंय | प्रतिनिधी
सत्तरींत खवदळ : दुबाविताचे मजतीन खून केल्ल्याचो दुबाव
भांगरभूंय । प्रतिनिधी
वाळपय : आंबेडे – नगरगांवच्या श्रवण बर्वे (24) हाच्या खून प्रकरणांत बापूय देविदास आनी भाव उदय हांकां वाळपय पुलिसांनी अटक केल्या. दुबावीत वासुदेव ओझरीकार हाचे मजतीन श्रवणाचो गळो आवळून खून केल्ल्याचें उक्तें जालां.
नगरगांवच्या श्रवण बर्वे हाच्या खून प्रकरणाक पुलिसांनी गती दिल्या. शुक्रारा 15 जाणांक चवकशे खातीर ताब्यांत घेतिल्ले. वेगवेगळ्या पांवड्याचेर चवकशी केले उपरांत दुबावीत म्हूण नगरगांवचो वासुदेव नकुळ ओझरीकार हाका पुलिसांनी ताब्यांत घेतला. ताचे कडल्यान पुलिसांक खूबशी म्हत्वाची म्हायती मेळ्ळ्या. ताणें दिल्ले म्हायती वयल्यान देविदास आनी उदय हांकां अटक केल्या, अशी म्हायती सुत्रां कडल्यान मेळ्ळ्या.
नगरगांवचो श्रवण देविदास बर्वे हाची कूड दुबावीत स्थितींत घरा मुखार आशिल्ले मुखेल गेटी लागसार सांपडिल्ली. सकाळीं 9 वरांचेर ताची कूड देविदास हांचे नदरेक पडली. हे संबंदांतली कागाळ वाळपय पुलीस स्टेशनाचेर केल्ली. वाळपय पुलिसांनी घडणुकेचे सुवातेर येवन प्रकरणाचो पंचनामो केल्लो. ताच्या गळ्या भोंवतणी दोरी सांपडिल्ली. मात थंय हाजीर आशिल्ले पुलीस अधिक्षक अक्षत कौशल हांणी सांगिल्लें, जे मेरेन पोस्टमार्टम अहवाल येना ते मेरेन ही आत्महत्या काय घातपात हें सांगपाक जावचें ना.
श्रवणाचे कुडीचेर बुधवारा गोमॅकाँत पोस्टमार्ट जाल्लो. तातूंत ताका गळो आवळिल्ल्यान स्वास घुस्पटून मरण आयिल्ल्याचें म्हणिल्लें. तशेंच ताचेर जिवघेणो हल्लो जाल्ल्याचेंय म्हणिल्लें. ते उपरांत पुलिसांनी तपासाची गती वाडयल्ली.
शुक्रारा रातीं वासुदेव ओझरीकार हाचे कडेन खोलायेन चवकशी केली. वेगवेगळे प्रस्न ताका विचारले. ते उपरांत वासुदेव हो दुबावीत आशिल्ल्याचें स्पश्ट जाले उपरांत शुक्रारा रातीं ताका अटक केली, अशी म्हायती अधिक्षक अक्षत कौशल हांणी पत्रकारांक सांगलें.
ह्या प्रकरणांत खूब जाणांच्यो जबानी नोंद केल्यात. तशेंच दुबावीत वासुदेवा कडल्यान मेळिल्ले म्हायती प्रमाण ह्या प्रकरणांत खूब जाणांचो हात आसा. ठोस पुराव्या उपरांत तांकांय अटक करतले. तातूंत उण्यांत उण्या स जाणांक अटक जावपाक शकता, अशें कौशल हांणी सांगलें.
मजगतीं, ह्या प्रकरणांत आस्पाव आशिल्ल्या सगळ्यांक ख्यास्त करची, अशी मागणी श्रवण हाच्या घरच्यांनी केल्या.
आबूज जाल्ल्यान वासुदेवा वयलो दुबाव वाडलो
शुक्रारा नगरगांव वाठारांतल्या खूबश्या जाणांक चवकशे खातीर ताब्यांत घेतिल्ले. सगळ्यांकूच पुलिसांच्या प्रस्नांक फुडो करचो पडलो. चडश्या सगळ्यांनीच सरळ जापो दिल्यो, मात वासुदेव ओझरीकार हो पुलिसांच्या खूबश्या प्रस्नांचेर आबूज जालो. ताका प्रस्नाच्यो सरळ जापो दिवपाक जाल्यो ना, हे खातीर ताचे वयलो दुबाव वाडलो. हे खातीर ताका दुबावीत म्हूण ताब्यांत घेतला, अशी म्हायती दनपारां सुत्रांनी दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
