भांगरभूंय | प्रतिनिधी
भांगरभूंय । प्रतिनिधी
पणजीः सत्तरी तालुक्यांतल्या नगरगांव पंचायतीचो पराग खाडीलकार सरपंच आसतना 2017-18 वर्सा जाल्लो लाखांनी रुपयांचो मोबायल टॉवर घोटाळो म्हायती हक्क अधिकारा खाला मेळिल्ले म्हायतींतल्यान उक्ताडार आयला. हे विशीं मुख्यमंत्री डॉ प्रमोद सावंत हाचे कडेन कागाळ केल्या. ताका लागून जायते जाण अडचणींत येवपाची शक्यताय आसा.
म्हायती हक्क अधिकारा खाला मेळिल्ले म्हायती प्रमाण नगरगांव पंचायत वाठारांत भारत संचाल निगम, रियायन्स इफॉखॉम आनी इंडस टॉवर हाचें मेळून वट्ट सात मोबायल टॉवर आसात. पंचायत मंडळान ह्या टॉवर धनयां कडल्यान तशेंच जमीन धनयां कडल्यान कसलोच टॅक्स घेतलो ना. अजपाची गजाल म्हणल्यार तेन्नाचो सरपंच पराग खाडिलकार हांणी पंचायती वतीन आपलो बापूय पुरुषोत्तम खाडिलकार हांचे कडेन 2017 वर्सा ब्रम्हाकरमळी टॉवर विशीं कबलात करून पंचायतीक दरवर्सा 16500 रुपये भाडे दिवचें अशें थारायलें. मात म्हायती हक्क अधिकारा खाला घेतिल्ले म्हायतींत अशें भाडे घेतिल्लें ना हे सामकार आयलां.
तेन्नाची उपसरपंच समिक्षा सालेकार हांणी लेगीत 2018 वर्सा अर्जुन दुधाळकार, रणजीत राणे आनी वासुदेव जोशी हांचे कडेन भाडें कबलात केली मात हें भाडें लेगीत पंचायतीचे तिजोरेंत जमा जाल्लें ना. ताका लागून पंचायतीची येणावळ बुडली. हे कबलात प्रकरणात भ्रश्टाचार जाल्ल्याचो दुबाव आसा. पंचायती वतीन कबलात केल्ली जाल्यार मोबायल टॉवराच्या भाड्याचे पयशे खंय गेले असो प्रश्न आतां उप्रासला.
साबार लोकांनी घरपट्टी भरली ना जाल्यार पंचायत तांका नोटिसो धाडटा. मात ह्या टॉवर भाडें प्रकरणात कसली कारवाय केल्या अशें लोक विचारपाक लागल्यात. गोंयांतल्या हेर पंचायत वाठारांत असलीं मोबायट टॉवर भाडें प्रकरणा जावपाची शक्यताय आशिल्ल्यान तांची चवकशी करपाची सध्या गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
