भांगरभूंय | प्रतिनिधी
भावंडांनो,
फाटल्या दिसांनी हांवें तुमकां एक प्रस्न विचारिल्लो तो म्हणल्यार ‘ म्हाका नखेत्रांमदीं वचपाक जाय’, ही अज्रंवर जाल्लीं उतरां कोणाची आनी तुमी म्हाका सत जाप दिल्लीय बी. ते म्हान अस्तुरेची आयज मुद्दाम याद काडटां कारण.. भावंडांनो, काल तिचे उगडासाचो दीस आशिल्लो. देखूनच तुमकां याद करून दिवपाक मुजरत आयज तिचे विशीं थोडेशें सांगतां.
भावंडांनो, तीं उतरां आशिल्लीं. अंतराळांतल्यान भारत मायेचें दर्शन घेवपाचो ध्यास लागिल्ल्या अंतराळ विरांगना कल्पना चावला हांची. तरणाटे पिळगेक फॉले युवर ड्रीम्स असो संदेश दिवन अंतराळांत विलीन जाल्ली हे भारत भुंयेची एस्ट्रोनॉट धूव कल्पना चावला. तांचो जल्म हरियाणांतल्या कर्नाल गांवांत 1 जुलय1961 वर्सा जाल्लो. भुरगेपणांतच जो ध्यास लागिल्लो तो पुराय करपाक कर्नालच्या रवींद्रनाथ टागोर विद्यालयांत मुळावें शिक्षण घेवन मुखार चंदिगडांतल्या अभियांत्रिकी म्हाविद्यालयांत एरोनॉटिकल इंजिनियरींग विशयांत कल्पनान बी.एस्सी पदवी घेतली. 1986 वर्सा अमेरिकेंतल्या टॅक्सास विद्यापिठांत एम. एस्सी पदवी मेळयत देसांतल्या खंयचेय चलयेन वा अस्तुरेन चलूंक नाशिल्ली वाट तिणें आपणायली. एयरोस्पेस आनी मॅकेनिकल विशयांत पदव्युत्तर पदवी मेळयल्या उपरांत 1988 वर्सा कॉलोराडो विद्यापिठांतल्यान एयरोस्पेस इंजिनियरींगात तिणें दोतोरकी मेळयली आनी आपले मोखी वटेन पावलां उखलीत रावली.
1988 वर्सा नासाच्या एमेस रिसर्च सेंटरातंत ती सेवे खातीर भितर सरली. 1993 वर्सा लॉस एल्टोसांतल्या ओव्हरसेट मॅथोडस कंपनीत प्रेसिडेंट म्हण पदभार सांबाळ्ळो. पुणून अवकाशांत वचपाचें सपन तिका सवकसायेन बसूंक दीय नाशिल्लें. अमेरिकेंतल्या नासा ह्या अवकाश संशोधन संस्थे कडेन एस्ट्रोनॉट जावपा खातीर परिक्षा दिली. 2962 उमेदवारां मदीं कल्पनाची निवड जाली. आनी उपरांत.. कठीण अशें प्रशिक्षण पुराय करून STS-87 मिशना खातीर मिशन स्पेशलीस्ट म्हण निवड जाली. अवकाश वीर म्हण कॉलंबियाच्या स्पेस शटलांतल्यांन अवकाशांत वचपी कल्पना चावला ही पयली भारतीय अस्तुरी थारली.
19 नोव्हेंबर 1997 दिसा कल्पना चावला आनी हेर पांच अवकाश विरांनी कोलंबिया स्पेस शटलावरीं अवकाशांत उड्डाण केलें. उड्डाणांत हेर विज्ञानीक प्रयोगा वांगडा यांत्रीक हाताचे संचालन कल्पनान केलें. एका उपगिऱ्याक मळबांत प्रक्षेपीत करपाची जापसालकी कल्पनाचेर सोंपयिल्ली. ह्या पयल्या अंतरिक्ष भोंवडेंत कल्पनान धर्तरे भोंवतणी 252 प्रदक्षिणां घालून वट्ट 375 वरांची भोंवडी केली. अंतराळ वीर म्हण सेगीत दोन वेळां कल्पना चावलाची निवड जाल्ली. पुणून कांय तांत्रीक बिघाडाक लागून हें उड्डाण मुखार धुकलून तें 16 जानेवारी 2003 वर्सा जालें. ते वेळार तातूंत कल्पना सयत आनीक स जाणांचो आसपाव आशिल्लो. 16 दीस ते स्पेस शटल, धर्तरे भोंवतणी रेवाडो घेवपाचो आशिल्लें. ऐशीं परस चड विज्ञानीक प्रयोग येसस्वी करपाची जापसालकी कल्पनाचेर घाल्ली. हे भोंवडेची यशस्वी रितीन सांगता करून 1 फेब्रूवारी 2003 क कोलंबिया स्पेस शटल धर्तरेचेर पावल दवरपाचें आशिल्लें. पुणून अचानक बिघाड जावन सगळ्यांची सपनां मातये भरवण जाली. “म्हाका नखेत्रां मदीं पावपाक जाय!” म्हणपी, तरणाटे पिळगेक “फॉलो युवर ड्रीम्स” म्हण संदेश दिवपी कल्पना चावला ते दिसा खऱ्या अर्थान संवसाराची नागरीक जाली. जिद्दी आनी हुशार कल्पना चावलान भारतीय एस्ट्रेनॉट म्हण आपली खाशेली सुवात दवरली. ह्या म्हान एस्ट्रोनॉटाक आनी नमळायेन, अभिमानान श्रद्धांजली ओंपुया आनी तिचे कार्या सावन उर्बा मेळोवन नवीं सपनां बाळगुया.
तुमकां तुमच्या शिक्षणीक मळार खूब खूब येस आंवडेतां. उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.