भांगरभूंय | प्रतिनिधी
गोंय खंडपिठाचे संबंदीत अधिकाऱ्यांक निर्देश
भांगरभूंय I प्रतिनिधी
पणजीः गोंयांत ध्वनी प्रदुशण अाडावपाक रातीं 10 उपरांत उक्त्या वाठारांत ध्वनीक्षेपक यंत्रणा वापरून पार्टी आयोजीत करप्यांचेर खर कारवाय करची, असो निर्देश गोंय खंडपिठान गोंय राज्य प्रदुशण नियंम्रण मंडळ (जीएसपीसीबी), उपविभागीय न्यायदंडाकिारी (एसडीएम) आनी उपविभागीय पुलीस अधिकारी (एसडीपीओ) हांकां दिलां.
तशेंच फुडले सुनावणे वेळार राज्याच्या दोनूय जिल्ह्यांच्या पुलीस अधिक्षकांक कारवायेचो अहवाल सादर करपाचो निर्देश जारी केला. ह्या प्रकरणाची फुडली सुनावणी 14 डिसेंबराक जातली.
ह्या प्रकरणांत सागरदीप शिरसयकार हांणी 2021त खंडपिठांत जनहीत याचिका दाखल केल्ली. हातूंत तांणी राज्य सरकार, उत्तर गोंय जिल्होधिकारी, म्हापशें जिल्होधिकारी, उत्तर गोंय पुलीस अधिक्षक, म्हापशें उपअधिक्षक, हणजूण पुलीस निरिक्षक, गोंय पर्यटन खातें, हणजूण पंचायतीचे सरपंच आनी सचीव, अबकारी आयुक्त आनी लारिव्ह बीच शॅकाचे धनी एलायनो परेरा हांकां प्रतिवादी केल्ले.
याचिकेंत शिरसयकार हांणी हणजूण दर्यादेगेर परवानगी नासतना लारिव्ह बीच क्लब रेव्ह पार्ट्यांचे आयोजन करता, अशें नमूद केलां. पार्ट्याे रातीं उसरां मेरेन सुरू जावन फातोड्डे मेरेन चालूच आसतात. ताका लागून वाठारांत मोट्या प्रमाणांत ध्वनी प्रदुशण जाता, असो मुद्दो तांणी उपस्थीत केल्लो. तशेंच ध्वनीप्रदुशणाचो मुद्दो उपस्थीत करतना ‘ध्वनीप्रदुशण (नेम आनी नियंत्रण) कायदो 2000 आनी पर्यावरण संरक्षण कायदो आनी नेम हांची खर अंमलबजावणी करपाची मागणी केल्ली.
हाची दखल घेवन खंडपिठान रातीं 10 उपरांत कसल्याच प्रकाराची ध्वनीक्षेपक यंत्रणा वापरपाचेर बंदी घालून ‘ध्वनीप्रदुशण कायदो 2000 आनी पर्यावरण संरक्षण कायदो आनी नेम हांची खरपणान अंमलबजावणी करपाचे निर्देश दिल्लें.
तशेंच आर्नोल्ड डिसा हांणी राज्यांत नायट क्लब, बार अॅण्ड रेस्टॉरण्ट, तशेंच वैयक्तीक नागरीक मध्यान रातीं मेरेन उक्ते सुवातेंत पार्ट्यो आयोजीत करतात, असो मुद्दो उपस्थीत केल्लो. ते खातीर ते कसलीच परवानगी घेनात अशी याचिका दाखल केल्ली. हे विशीं तांणी खंडपिठांत अवमान याचिका दाखल केल्या.
ह्या प्रकरणाची बुधवारी सुनावणी जाली. राज्यांत 19 ते 25 नोव्हेंबर मजगतीं उक्तें सुवातें रातीं 10 उपरांत पोर्ट्यो आयोजीत केल्ल्याचे पुरावे डिसा हांणी खंडपिठांत सादर केले. वागातोर, शापोरा, हरमल, मोरजी, मांद्रें आनी हेर दर्यादेगांचेर मेळून 15 पार्ट्यो आयोजीत केल्ल्याचेय पुरावे सादर केले. हाची दखल घेवन खंडपिठान वयलें निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
