भांगरभूंय | प्रतिनिधी
गोवा फॉरवर्डाची मागणी
मडगांव, प्रतिनिधी ः गोवा फॉरवर्डाचे सरचिटणीस दुर्गादास कामत हांणी आयज बाळ्ळींत जाल्लो अपघात रस्त्या कुशीक कसलीच संरक्षण प्रणाली नाशिल्ल्यान जाला असो दावो करून अपघात जाल्ल्या सुवातेर क्रॅश बॅरियर्स आसल्यार बस सकयल पडटा नासली असो दावो केला. मुख्यमंत्र्यान गोंयांतल्या अशा सगल्या धोक्याच्या रस्त्यांचें बेगोबेग ऑडिट करचे आनी गरज पडल्यार क्रॅश बॅरियर बांदपाची अशी मागणी केली.
दुर्गादास कामत हांच्या सयत गोंय फॉरवर्डचे जेश्ठ पदाधिकारी मोहनदास लोलयेंकार आनी विकास भगत हांणी आयज दक्षीण गोंय जिल्लो हॉस्पिटलांत भेट दिवन थंय उपचार घेवपी विद्यार्थ्यांची चवकशी केली.
उपरांत प्रसार माध्यमां कडेन उलयतना कामत हांणी सांगलें, फाटल्या विधानसभा अधिवेशनांत येरादारी खात्याच्या मागण्यांचेर चर्चा करतना गोंय फॉरवर्डचे अध्यक्ष विजय सरदेयास गोंयच्या सगळ्या रस्त्यांचे कुशीक क्रॅश बॅरियर्स उबारपाची सुचोवणी केल्ली. ही सुचोवणी मान्य करून उपाय केल्ले जाल्यार आयचो अपघात जावचो नासलो. बशीं वयलो ताबो सुटून बस भायर गेल्ली आसली तरी बॅरियर्साक लागून बस पलटी जावची नासली असो दावो कामत हांणी केलो. सध्या भौशीक बांदकाम खातें मुख्यमंत्री प्रमोद सावंत हांचे कडेन आसा. आतां तरी हे मागणे कडेन गंभीरतायेन पळोवचे अशें तांणी सांगलें.
मजगतीं, शाळांक दिल्ल्या बालरथींची देखरेख कोण आनी कशी करता हाचेर ऑडिट करपाची गरज आसा अशें विकास भगतान सांगलें. ह्या बालरथाची सारकी देखरेख जायना देखून अशे अपघात जातात असो आरोप तांणी केलो. ह्या संबंदीय सरकारान गंभीरताय दाखोवची अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
