भांगरभूंय | प्रतिनिधी
5 चलयांची सुटका; दोगां बायलांक अटक
म्हापशें: केनियांतल्या चलयांक गोंयांत ब्युटी पार्लरांत नोकरी दिवपाचें हांयस दाखोवन तांकां जबरदस्तीन शिंदळकी वेवसायांत धुकलपी आंतरराष्ट्रीय टोळी हणजूण पुलिसांनी उक्तडार हाडली. एका पिडेस्त चलयेन पुलीस स्टेशनार धांव घेवन हें अनैतीक संबंद उक्तडार हाडलें.
ह्या प्रकरणांत पुलिसांनी दुबावीत मारिया डोर्कास उर्फ इस्त्रालीट (28) आनी विल्किस्टा आचिस्टा (22) ह्या केनियन नागरीक बायलांक अटक केल्या. जाल्यार 19 ते 27 पिराये गटांतल्या पांच केनियन पिडीत चलयांची पुलिसांनी सुटका केल्ल्याची म्हायती पुलीस अधिक्षक निधीन वाल्सन हांणी दिली.
बिरेस्तारा 7 वेर एके पिडीत चलयेन हणजूण पुलीस स्टेशनार धांव घेवन आपल्याक बळयां शिंदळकी वेवसायांत धुकलतात अशी म्हायती दिली. ते प्रमाण हणजूण पुलिसांनी शुक्रारा पिडितेन सांगिल्ल्या वागातोरांतल्या रिसॉर्टाचेर धाड घाली. दुबावीत बायलां रिसॉर्टाचे कुडींत आशिल्ल्यो. दुबावितांच्या कबुलीच्या आदारान पुलिसांनी सदर रिसॉर्टांतले आनीक एके कुडीचेर धाड घाली थंय चार तरणाट्यो सांपडल्यो. ह्या चारूय चलयांची जबानी घेवन तांची सुटका केली.
उपरांत पुलिसांनी भादंसंच्या 370, 370 अ आनी 34 तशेंच वेश्या वेवसाय प्रतिबंधक कायदो कलम 4, 5 आनी 8 खाला गुन्यांव नोंद करून दुबावीत दोनूय बायलांक अटक केली. जाल्यार ह्या प्रकरणांतलो ओलोक्पा नांवाचो नायजेरियन नागरीक फरार आसा. ताचो सोद पुलीस घेतात. तशेंच पांचूय पिडितांक मेरशे सुदारघरांत धाडून दिल्यात.
मजगतीं, दुबावीत आरोपींनी पिडितांक तांच्या मूळ देशांत बऱ्या पगाराची ब्युटी पार्लरांत नोकरी दिवपाचें हांयस दाखोवन गोंयांत हाडिल्लीं. हे खातीर दुबावीत तांचो प्रवास खर्च स्वता करताले. हांगा पावतकूच दुबावीत पिडीत तरणाट्यांचे पासपोर्ट बळयां घेताले आनी तांकां वेश्या वेवसाय करपाक भाग पडटाले. ताचे बदला तांकां पयशे लेगीत दिनासले. दुबावीत एका हॉटेलांत राबितो करिनासतना वेगळ्योवेगळ्यो सुवातो बदलताले. हालींच वागातोरा रिसॉर्टांत ते देंविल्ले.
पुलीस उपअधिक्षक जिवबा दळवी हांच्या मार्गदर्शना खाला निरिक्षक प्रजल नायक देसाय हांच्या फुडारपणा खाला हणजूण, म्हापशें आनी कोलवाळ पुलीस पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
