भांगरभूंय | प्रतिनिधी
धारबांदोडा: प्रतापनगर- धारबांदोड्यां म्हामार्गा कुशीक आशिल्ल्या झिलींनीं सोमारा सकाळीं एके अनवळखी चलयेची कूड सांपडिल्ली. ह्या वेळार पुलिसांक ते चलयेचो गळो चिरून खून केल्ल्याचेंय दिसून आयिल्लें. उपरांत काल सावन नेटान चवकशी करताले. चोवीस वरां भितरूच पुलिसांनी दुबाविताक अटक केली. तशेंच ते चलयेची वळखूय पटली.
चवकशे मजगतीं पुलिसांच्या हाताक एक सिसीटीव्ही फुटेज लागली. तातूंत ती चली आनी तिचो इश्ट दोगांय एका हॉटेलांत च्या पिवपाक राविल्ल्याचें दिसता. हे फुटेजीच्या आदारार पुलिसांक ते चलयेची आनी तिच्या इश्टाची वळख पटली. काल रातीं पुलिसांनी ह्या प्रकरणांत ते चलयेचो इश्ट संजय कॅविन (२२) हाका अटक केल्या. खून जाल्ले चलयेचें नांव रोशिनी मोसेस एम. (बंगळुरू, २२) अशें आसा.
संजयान पुलिसांक दिल्ले म्हायती प्रमाण, तीं दोगांय मोगान आशिल्लीं आनी लग्न जावपा खातीर बंगळुरूच्यान गोंयांत बसीन आयिल्लीं. मात गोंयांत पावतांच तांचे मदीं कांय कारणांक लागून वाद जालो. ह्या वादांतल्यान संजय कॅवीन हाणें रोशिनीचो जीव घेतलो.
सध्या पुलिसांनी दुबावीताक अटक केल्या. फोंडें पुलिसांच्या पंगडान तशेंच पुलीस निरीक्षक विजयनाथ कवळेकार हांणी २४ वरां भितरूच खुनाचो तपास लायिल्ल्यान तांची सगळे कडेन तोखणाय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
