भांगरभूंय | प्रतिनिधी
हेर गोरवां बरोबर भोंविल्ल्यान दुयेंस पातळपाची शक्यताय
फोंडें: धारबांदोड्यां काल (मंगळारा) दोन दुबावीत लंपी व्हायरसाचीं पाडकां सांपडलीं. दोनूय पाडकां हेर गोरवां बरोबर भोंवत आशिल्ल्यान दुयेंस पातळपाची चड शक्यताय आसा. धारबांदोडें म्हालांतल्या गोरवां सांबाळ खात्याच्या दोतोरांनी गांवांत वचून दुबावीत पाडकाच्या रगताचे नमुने घेवपाचो यत्न केलो. पूण दोनूय पाडकां पळून गेल्ल्यान दोतोरांचो यत्न फसलो.
धारबांदोडें पंचायत वाठारांतल्या एका गांवांत मंगळारा दुबावीत लंपी व्हायरसाचीं दोन पाडकां सांपडले उपरांत थळाव्या पंचान गोरवां सांबाळ खात्याक म्हायती दिली. हातूंतलें एक पाडूक न्हंयेचे देगेर बशिल्लें स्थितींत दिसून आयिल्लें. दोनूय पाडकांच्या आंगार फोड दिसून येताले.
धारबांदोडें म्हालांतल्या गोरवां सांबाळ खात्याच्या दोतोरांनी रोखडीच गांवाक भेट दिवन न्हंयचे देगेर बशिल्ल्या पाडकाक इंजेक्शन दिलें. पूण रगताचे नमुने काडचे पयलींच पाडकान धांव मारली. सद्या दुबावीत पाडकां हेर गोरवां बरोबर भोंवत आसात. ताका लागून दुयेंस पातळपाची शक्यताय थळाव्या लोकांनी उक्तायल्या.
मेळिल्ले म्हयती प्रमाण गांवांत सुमार 150 परस चड गोरवां आसात आनी रातच्या वेळार सगलीं गोरवां रस्त्यार ठाण मांडून बसतात. तशेंच सगलीं गोरवां वाठारांतल्या पडीक शेतांत एकठांय येतात. दुबावीत दोन पाडकां हेर गोरवां बरोबर भोंवल्यार दुयेंस पातळपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
